लन्डन । इंग्लिस प्रिमियर लिगमा गएराति भएको खेलमा चेल्सीले लुटन टाउनलाई ३-२ ले पराजित गरेको छ । लुटनको केलिन वर्थ रोडमा भएको खेलमा ३ गोलले पछि परेको अवस्थाबाट घरेलु टिमले दुई गोल फर्काएको हो ।

यस्तै अर्का खेलमा म्यानचेस्टर सिटी विजयी भएको छ । शनिबार राति भएको खेलमा सिटीले सेफिल्ड युनाइटेडलाई २–० गोल अन्तरले पराजित गरेको हो । सिटीलाई जिताउन रोड्रिले १४ औँ तथा जुलियन अल्भारेजले ६१ औँ मिनेटमा गोल गरेका थिए । जितसँगै सिटी १९ खेलबाट ४० अङ्कका साथ तालिाको तेस्रो स्थानमा छ ।

फर्ममा रहेका चेल्सीका कोल पाल्मले दुई गोल गरे । १२औं मिनेटमै गोल गरेर चेल्सीलाई अग्रता दिलाएका उनले ७० मिनेटमा गोल थपे । नोनी मोडु-आखेले ३७औं मिनेटमा गोल गरेका थिए । तर खेलको ८० मिनेटपछि लुटनले दुई गोल फर्काए पनि चेल्सीले कमब्याक गर्न सकेन । जितसँगै चेल्सी १०औं स्थानमा उक्लिएको छ ।

गएरातिकै अर्को खेलमा नटिंघम फरेस्टसँग म्यानचेस्टर युनाइटेड २-१ ले पराजित भएको छ । युनाइटेडको लागि मार्कस रासर्फडले गरेको एकमात्र गोल पर्याप्त नहुँदा युनाइटेड पराजित भएको हो । पराजित युनाइटेड ३१ अंकसाथ लिगको सातौं स्थानमा छ ।

फरेस्ट भने १५‌औं स्थानमा उक्लिएको छ । प्रिमियर लिगकै अर्को खेलमा एस्टन भिल्लाले १० खेलाडीमा समेटिएको बनर्लीलाई ३-२ ले हराएको छ । सुरुआति अग्रता बनाउँदै भिल्लाले जित दर्ता गरेको हो ।

त्यसैगरी क्रिस्टल प्यालेससँग ब्रेन्टर्फड ३-१ ले पराजित भएको छ । पाहुना टोली ब्रेन्टर्फडले खेलको दोस्रो मिनेटमै अग्रता बनाए पनि क्रिस्टलले पुनरागमन जित दर्ता गरेको थियो । गएरातिकै अर्को खेलमा उल्भ्ससँग एभर्टन ३-० ले पराजित भएको छ । पराजयसँगै एभर्टन रेलिगेसन जोनमा कायम छ ।