धादिङ । निलकण्ठ माध्यामिक विद्यालय धादिङमा अध्ययनरत ३ जना बालिका बुधबारदेखि सम्पर्कविहीन भएका छन् । कक्षा ९ मा अध्ययनरत ती बालिकाहरू हिजो बिहान दश बजे विद्यालय आएका र त्यसपछि घर नआएपछि उनका अभिभावकहरूले खोजी गरेको हो ।

तीनै बालिकाहरूलाई खोजी गरिदिन उनिहरुका अभिभावक बिहीबार जिल्ला प्रहरी कार्यालय धादिङमा आएपछि प्रहरीको समेत सक्रियतामा उनीहरूको खोजी भइरहेको जिल्ला प्रहरी कार्यालय धादिङका सूचना अधिकारी प्रहरी नायब उपरीक्षक मकेन्द्रकुमार मिश्रले बताएका छन् ।

सम्पर्कविहीन बालिकाहरुमध्ये तीनै जना कक्षा ९ मा अध्ययनरत १४ वर्षीय रोशनी बिक, सुशिला तामाङ्ग र अस्मिता गुरुङ्ग रहेको उनीहरुका अभिभावकले बताएका छन् ।