काठमाडौं । नेपाली कांग्रेसनिकट लोकतान्त्रिक खेलकुद संघले आयोजना गर्ने सभापति कपको खेल तालिका सार्वजनिक भएकाे छ । १० माघबाट सुरु हुने खेलमा उद्घाटन खेल चर्च ब्वाइज युनाइटेड र संकटा क्लबले प्रतिस्पर्धा गर्ने छन् ।

प्रतियोगिताका सबै खेल त्रिपुरेश्वरस्थित दशरथ रंगशालामा हुनेछन् ।

प्रतियोगितामा दुई विभागीय टिमसहित आठ टिम सहभागी छन् । विभागीय टोली नेपाल पुलिस क्लब र सशस्त्र प्रहरी बलको एपिएफ सहभागी हुनेछन् । त्यस्तै, चर्च ब्वाइज, मछिन्द्र फुटबल क्लब, संकटा फुटबल क्लब, न्युरोड टिम एनआरटी फुटबल क्लब, फ्रेन्ड्स फुटबल क्लब र आयोजकको बागमती फुटबल क्लबले सहभागिता जनाउनेछन् ।

प्रतियोगिताको विजेताले २६ लाख र उपविजेता टोलीले १३ लाख रुपैयाँ प्राप्त गर्नेछन् । सर्वोत्कृष्ट खेलाडीलाई ७५ हजार, उत्कृष्ट गोलकिपरलाई ५० हजार, सर्वाधिक गोलकर्तालाई ५० हजार, उत्कृष्ट उदीयमान खेलाडीलाई २५ हजार र प्लेयर अफ दी म्याचलाई १५ हजार प्रदान गरिनेछ ।

प्रतियोगिताको फाइलन खेल माघ १७ गते हुनेछ ।