काठमाडौँ । सांसद हर्क साम्पाङले प्रधानमन्त्री वालेन्द्र शाह (बालेन)ले प्रतिनिधि सभामा उपस्थित भई सांसदका प्रश्नको जवाफ नदिएको विषयमा कडा आपत्ति जनाएका छन्।

प्रतिनिधि सभाको बैठकमा बोल्दै उनले सरकार प्रमुखको भूमिकामै स्पष्टता नदेखिएको भन्दै संसद्प्रति उत्तरदायित्वबारे गम्भीर प्रश्न उठाए। उनका अनुसार सांसदहरूले उठाउने प्रश्नको जवाफ नदिने अवस्था जनताको प्रश्नलाई बेवास्ता गर्नु सरह हो।

साम्पाङले प्रधानमन्त्रीले संसदमा उपस्थित भएर आफ्ना निर्णय र नीतिबारे स्पष्ट धारणा राख्नुपर्ने दायित्व रहेको उल्लेख गर्दै त्यसो नगर्नु अस्वाभाविक हुने बताए। उनले प्रधानमन्त्रीको अनुपस्थितिलाई लक्षित गर्दै “सरकार प्रमुख छ कि छैन भन्ने नै अस्पष्टजस्तो अवस्था देखिएको” टिप्पणी गरे।

उनले जनप्रतिनिधिहरूले उठाएका विषयहरूको जवाफ नआउनु जनताप्रति उत्तरदायित्व कमजोर हुनु हो कि भन्ने प्रश्न पनि उठाए। साथै, सीमा क्षेत्रका समस्या र सुकुम्वासी बस्तीमा गरिएको कारबाहीबारे पनि सरकार स्पष्ट हुनुपर्ने उनले बताएका छन्।