हट्यो सारा हिलो मैलो हरायो पानीको वर्षा
भवानीको भयो पूजा चल्यो आनन्दको चर्चा

हामी यतिखेर सम्पूर्ण नेपालीहरुको महान पर्व दशैं धुमधामका साथ मनाइरहेका छौं । यो पर्व सबै नेपालीलाई जोड्ने एक साझा सांस्कृतिक पर्व हो । नेपाल आफैंमा बहुजाति,बहुभाषी र बहुसांस्कृतिक अर्थात् विविधतामा एकता भएको तपोभूमि हो । सबै पर्वको महत्व उत्तिकै छ । त्यो भन्दा माथि हामी दशैंलाई साझा पर्वको रुपमा परापूर्वकालदेखि नै मनाउँदै आइरहेका छौं ।
दशैं असत्यमाथि सत्यको विजय,आसुरी शक्तिमाथि दैवी शक्तिको विजयका प्रतीकका रुपमा हामी मनाउँछौं । शरद ऋतुको यो पर्व आफैंमा हर्ष र उल्लासको पर्व पनि हो । सफा आकाश, राम्रो मौसम, खेतहरूमा लहलह झुलिरहेका धानका बाला, अनि कोदो फुल्दै गरेका बारीहरु, आहा ! दशैं । लिङ्गे र रोटे पिङको चचहुई, विभिन्न शक्तिपीठको दर्शन, पुजाआजा, आफूभन्दा ठूला मान्यजनबाट टीका आशिर्वाद ग्रहणसहित निधारभरिको रातो टीका र जमरा, मीठा परिकार,पारिवारिक पुनर्मिलन र नयाँ कपडा,घर वरिपरि फुल्दै गरेका मखमली र सयपत्रीका रंगीविरंगी फूल,आहा ! यति मात्र सम्झंदा पनि दशैंले हामीलाई उत्साहित र उल्लासित बनाउँछ ।

दशैं सारा नेपालीलाई एकताको मालामा उन्ने हर्षोल्लासको पर्व हो । आपसी वैमनस्यता,रीस,राग र विमति सबै भुलेर हामी दुर्गा भवानीको आशिर्वाद लिन यो चाड मनाई रहेका छौं । यो चाड न्यायको चाड हो। सुख,खुशी र उमंग साटासाट गर्ने चाड हो । पारिवारिक र सामाजिक पुनर्मिलनको चाड हो । अहिले सर्वत्र मालश्रीका मङ्गलधुन बजेका छन् । गाउँघर सुवासित छन्। शहरबाट गाउँ फर्केर दशैं मनाउनेहरु रमाई रहेका छन् । मुलुकभित्र सबैभन्दा बढी आर्थिक कारोबार पनि यही चाडमा हुने गर्दछ। आर्थिक,सामाजिक र सांस्कृतिक रुपमा यो पर्व सबैभन्दा माथि छ । यो पर्व एकताको प्रतीक पनि हो ।

दशैंका नौ दिन जसलाई नवरात्रका नौ दिन समेत भनिन्छ, विभिन्न शक्तिपीठको पूजा आराधना गरी अन्तिम दिन विजयको प्रतीक विजयादशमी मनाएर टीका लगाइन्छ । पौराणिक कथा अनुसार संसारको विनाश गर्न खोज्ने महिषासुर नामक राक्षसलाई दुर्गा माताले मारेको अनि अहङ्कारी, अन्यायी, अत्याचारी रावणमाथि रामले विजय गरेको स्मरणमा बडादशैं मनाइने गरिएको छ । दुर्गा माताका नौ स्वरूप योग साधना, वैराग्य, संयम र सदाचार, हाँसो, चैतन्य, धर्म, अर्थ, काम र मोक्ष, सिद्धि, कलुषिताको अन्त्य आदि सम्बन्धित मानिन्छ । संसार मास्न खोज्ने महिषासुर राक्षसलाई मारेर मानव सृष्टि संरक्षण गर्न सक्ने शक्तिपुञ्जस्वरूप नारीशक्ति हुन् दुर्गा ।

दशैंको धार्मिक र ऐतिहासिक पक्षसँगै बहुआयामिक महत्त्व छ । नेपाली जहाँ पुगेका छन् त्यहाँ दशैं पुगेको छ । उमंग र खुशी पुगेको छ। यो दशैं पर्वको व्यापकता हो ।

दशैं सबै नेपालीमन र नेपालीजनलाई जोड्ने पवित्र चाड हो । यो चाडले आपसी द्वेषको अन्त गरी खुशीयाली बाँड्न सक्ने शक्ति प्राप्त होस्। अभाव, गरीबी र दु:ख सबै बिर्सिएर हर्षोल्लासका साथ मनाइने यो पर्वले सम्पूर्ण नेपालीहरुको समृद्धिको ढोका खोल्न सकोस् । सुख,शान्ति र सम्मृद्धिका लागि सबैलाई हार्दिक मंगलमय शुभकामना ।

जता जाउ उतै भन्छन दशैं आयो दशैं आयो
यही आनन्द चर्चाले सबै संकष्ट बिर्सायो ।