खोटाङ ।  खोटाङको खोटेहाङ गाउँपालिकाका दलित समुदायले अपहेलित नाम र जातको ठाउँमा सम्मानजनक नाम र थर राख्ने व्यवस्था कार्यान्वयनको माग गरेका छन् ।

ईलाका प्रशासन कार्यालय खोटाङबजारमा माग–पत्र बुझाउँदै अपहेलित नाम र जातको ठाउँमा सम्मानजनक नाम र राष्ट्रिय दलित आयोगको सूचीमा रहेको थरका आधारमा नागरिकता र अन्य पञ्जिकरणका कागजात सच्याएर प्रतिलिपि जारी गर्ने व्यवस्था कार्यान्वयनको माग गरेका हुन् । 

गाउँपालिकाका दलित समुदायका अगुवा साने बिश्वकर्मा (एसबि), युवराज कालीकोटे, मनोजकुमार परियार, सुरेश बिश्वकर्मा, रञ्जु परियार र कुमार बिश्वकर्माको टोलीले दलितको थर परिवर्तन गर्ने सम्वन्धमा गृह–मन्त्रालयबाट विभिन्न समयमा जारी गरिएका निर्णय र परिपत्रलाई सकरात्मक ढंगबाट कार्यान्वयन गर्न निवेदन गरेका हुन् । दलित समुदायको थर परिवर्तन गर्ने सम्वन्धमा गृह–मन्त्रालयले २०७९ पुस ३ गते सबै स्थानीय पञ्जिकाधिकारीलाई पत्राचार गरेको थियो । 

गृह–मन्त्रालयले १६ वर्षमुनिका बालबालिकाको दलित जातीय थर प्रयोग गरी जन्मदर्ता भएकोमा सो परिवर्तन गरीदिन सुचक बस्नयोग्य सम्वन्धित व्यक्तिबाट निवेदन प्राप्त भएमा राष्ट्रिय दलित आयोगद्धारा प्रकाशित दलित जातीय अनुसूची विवरणमा उल्लेख भएमा सम्वन्धित दलित जातीभित्रको थरहरुमध्येबाट निवेदकले चाहेको थर राखी जन्मदर्तामा थर परिवर्तन गरी प्रतिलिपि जारी गर्ने, वालबालिकाको थर परिवर्तनका साथै निजको बुवा, आमा वा सूचकको थर परिवर्तन गरिदिन निवेदन प्राप्त भएमा बुवा, आमा वा सूचकको नागरिकता प्रमाण–पत्रमा थर संशोधन भएको प्रमाण राखेर मात्रै थर परिवर्तन गरिदिने र १६ वर्षभन्दा माथिका व्यक्तिको घटना दर्ता प्रमाण–पत्रमा थर परिवर्तन गरिदिन आधिकारिक व्यक्तिबाट निवेदन प्राप्त भएमा नागरिकता प्रमाण–पत्र संशोधन भएको थर अनुसार थर परिवर्तन गरी प्रतिलिपि जारी गर्नका लागि पत्राचार गरेको थियो ।