लन्डन । वेस्टहमविरुद्ध प्रभावशाली जित दर्ता गर्दै लिभरपुल ईएफएलको सेमिफाइनलमा प्रवेश गरेको छ । घरेलु मैदान एनफिल्डमा लिभरपुलले वेस्टहमलाई ५–१ को फराकिलो अन्तरले पराजित गर्‍यो ।

डोमिनिक सोबोस्लाइले २८ मिनेटमा २५ यार्डबाट गोल गर्दै लिभरपुललाई अग्रता दिलाए । कर्टिस जोन्सले ५६ औं मेटमा अग्रता दोब्बर पारे । ७१ औं मिनेटमा कोडी गाक्पोले सिजनको आफ्नो आठौँ गोल गरेपछि लिभरपुलले ३–० को अग्रता लियो ।

७७ औँ मिनेटमा जारोड बोवेनले वेस्टहमका लागि सान्तोना गोल फर्काए । ८२ औं मिनेटमा मोहम्मद सलाह र त्यसको २ मिनेटपछि जोन्सले व्यक्तिगत दोस्रो गोल गर्दै ५–१ को जित निश्चित गरे । अन्तिमका दुवै गोलमा वैकल्पिक खेलाडी ट्रेन्ट अलेक्जेन्डर–अर्नोल्डको असिस्ट रह्यो । जोन्सको दोस्रो गोल लिभरपुलले यस प्रतियोगितामा गरेको ५ सयौँ गोल थियो । योसँगै २०२२ को च्याम्पियन लिभरपुल कीर्तिमान विस्तार गर्दै १० औं पटक उपाधि जित्ने लक्ष्यमा छ ।

लिभरपुलले सेमिफाइनलमा फुलहमको सामना गर्नेछन् । सेमिफाइनलको पहिलो लेग ८ जनवरी र दोस्रो लेग त्यसको दुई हप्ता पछि हुनेछ ।