काठमाडौं । नेपाल प्रिमियर लिग (एनपीएल) क्रिकेट खेल्न नेदरल्यान्ड्सका ब्याटर माइकल लेभिट काठमाडौं आइपुगेका छन् ।

लेभिटलाई उनी आबद्ध टोली काठमाडौं गुर्खाजले भव्य स्वागत गरेको छ । उनलाई ढाकाटोपी र खादा लगाइदिएर बाजागाजासहित स्वागत गरिएको छ । लेभिट एनपीएल खेल्न काठमाडौं आउने पहिलो विदेशी खेलाडी हुन् ।

काठमाडौं गुर्खाजको विदेशी खेलाडीमा लेभिटसँगै नामिबियाका जेरार्ड इरसमस, इङ्गल्यान्डका स्टेफेन इस्किनाजी, नाथन सोउटर र ड्यान डौथवेट छन् । राष्ट्रिय टोलीका अलराउन्डर करण केसी मार्की खेलाडी रहेको काठमाडौं गुर्खाजको मुख्य प्रशिक्षकमा वसन्त शाही ठकुरी छन् ।

नेपाल क्रिकेट सङ्घ (क्यान) को आयोजनामा आठ टोली सहभागी हुने एनपीएल यही मङ्सिर १५ गतेदेखि पुस ६ गतेसम्म आयोजना हुँदैछ । उद्घाटन खेलमा विराटनगर किङ्गस र जनकपुर बोल्ट्स खेल्दैछन् ।