इजरायली प्रधानमन्त्री बेन्जामिन नेतान्याहुले हिजै हुने भनिएको गाजा युद्धविराम सम्झौता अनुमोदनका लागि मन्त्रिपरिषद्बाट सहमति लिन ढिलाई गरेका छन् ।

हमासले सम्झौता अन्तिम समयमा परिवर्तन गर्न खोजेको आरोप लगाउँदै नेतान्याहुले मन्त्रिपरिषद्बाट अनुमोदनका लागि ढिलाई गरेको बताइएको छ ।

अमेरिकी विदेशमन्त्री एन्टोनी ब्लिङ्केनले युद्धविराम सम्झौतामा केही ढिलाई भए पनि आइतबारबाट यो प्रकृया सुरु हुने विश्वास व्यक्त गरेका छन् ।

महिनौंको वार्तापछि इजरायली वार्ताकारहरूले सम्झौतामा सहमति जनाए पनि सुरक्षा मन्त्रिपरिषद् र सरकारबाट अनुमोदन नभएसम्म कार्यान्वयन हुन नसक्ने अवस्था छ । हमासले भने सम्झौतामा प्रतिबद्ध रहेको जनाएको छ ।

तर हमासले अन्तिम समयमा सम्झौता अन्तर्गत रिहा हुने प्यालेस्टिनी कैदीहरूको सूचीमा आफ्ना केही सदस्यहरूलाई थप्न खोजेको बुझिएको छ ।

हमासद्वारा सञ्चालित स्वास्थ्य मन्त्रालयका अनुसार बुधवार सम्झौताको घोषणा पछि गाजामा इजरायली आक्रमणमा ८० जनाभन्दा बढी मानिसको मृत्यु भएको छ । यो घटनाले पनि सम्झौतामा ढिलाइ भएको बताइएको छ ।