म्यानमार र थाइल्याण्डमा शक्तिशाली भूकम्पमा परी ज्यान गुमाउनेको सङ्ख्या १६ सय पुगेको छ ।

अन्तर्राष्ट्रिय सञ्चार माध्यमका पछिल्लो विवरण अनुसार १६ सय जनाको मृत्यु हुँदा भूकम्पमा परी २ हजार ३ तीन सय जना भन्दा धेरै घाइते भएका छन् । भत्किएका भवनहरूमा फसेकाहरुको खोजी र उद्धार कार्य चलिरहेको छ ।

भूकम्पले म्यानमारमा भवन, पुल, सडक भत्किएका छन् । म्यानमारको सैन्य सरकारले अन्तर्राष्ट्रिय सहयोगका लागि अपिल गरेको छ । सैन्य सरकारले देशका ६ ठाउँमा आपतकालीन अवस्था घोषणा गरेको छ ।

त्यस्तै थाईल्याण्डले पनि आपतकालीन अवस्था घोषणा गरेको छ । म्यानमारमा शुक्रबार ७ दशमलव ७ म्याग्निच्युडको शक्तिशाली भूकम्प गएको थियो । भूकम्पले म्यानमार र सीमावर्ती थाइल्यान्डका बैंककसहित विभिन्न क्षेत्रमा क्षति पुगेको छ ।

भूकम्पको धक्का थाइल्याण्डको बैंकक, चीन र भारतमा समेत महशुस गरिएको समाचारमा उल्लेख छ ।