काठमाडौं । काठमाडौं उपत्यकामा आज वायु प्रदूषण मापनमा विश्वकै दोस्रो स्थानमा छ ।

मंगलबार प्रदूषणको दृष्टिले विश्वकै पहिलो स्थानमा रहेको नेपाल आज दोस्रो स्थानमा ओर्लिएको हो । ‘एयर क्वालिटी इन्डेक्स’ले आज काठमाडौं उपत्यकाको वायु प्रदूषणमा विश्वको दोस्रो स्थानमा देखाएको हो ।

इन्डेक्सका अनुसार आज बिहानको मापन अनुसार काठमाडौंको समग्र वायु गुणस्तर सूचकाङ्क एक्यूआई २ सय ६८ छ । आज प्रदूषणको दृष्टिले भारतको राजधानी नयाँ दिल्ली पहिलो स्थानमा रहेको छ । लामो समयदेखि पानी नपर्दा काठमाडौंको आकाशमा थुप्रिएको धुलो र उपत्यका आसपासका विभिन्न जंगलमा लागेको डढेलोको धुँवाको कारण उपत्यकामा वायु प्रदूषणको मात्र उच्च भएको हो ।

काठमाडौं उपत्यका पछिल्लो साता उकुसमुकुस छ । हुप्प गर्मी र पिरो हावाले सास फेर्नै कठिन भएको छ । आँखा पोल्ने, घाँटी खसखस हुने, नाक सुक्खा हुने जस्ता समस्याले स्वास्थ्य समस्या थपेको छ । काठमाडौंको वायु मानव स्वास्थ्यको लागि हानिकारक भएकाले बिहानको समयमा सकेसम्म घर बाहिर ननिस्कन चिकित्सकको सुझाव छ ।

वायु प्रदूषण उच्च भएसँगै उपत्यकाबासीमा आँखा पोल्ने चिलाउने, सुक्खा हुने, नाक सुक्खा हुने घाँटी खसखसाउने, खोकी लाग्नेजस्ता समस्या बढेको छ । निर्माण र कलकारखानाबाट निस्कने धुवाँधुलोले सधैँ जसो वायुु खराब बनाइरहेको काठमाडौंमा अबका झन्डै डेढ महिना डढेलोको प्रभावले घातक असर पु¥याउनसक्ने आंकलन छ ।

वातावरण विभागले वायु प्रदूषणको असर कडा हुँदै गएकाले सावधानी अपनाउन आमनागरिक र सरोकारवाला निकायलाई अपिल गरेको छ ।