वासिङ्टन डिसी । अमेरिकाको दक्षिण र मध्यपश्चिम क्षेत्रमा भयानक आँधीले ठुलो क्षति पुर्‍याएको छ । आँधीमा परेर एक युवकको मृत्यु भएको छ । यसका साथै, बिजुलीका तार र रूखहरू ढलेका छन् ।

धेरै घरका छाना आँधीले उडाएका छन् । मौसम विभागले अर्कान्सास, इलिनोइस, इन्डियाना, मिसौरी र मिसिसिपीको केही भागमा आँधीबेहरीको चेतावनी जारी गरेको थियो । आगामी चार दिनको लागि हिम आँधी र बाढीको लागि चेतावनी पनि जारी गरिएको छ ।

दक्षिण पूर्वी मिसौरीमा आँधीले एकजना युवकको मृत्यु भएको अधिकारीहरूले बताएका छन् । यसैबिच, इन्डियानामा एउटा गोदामको एक भाग भत्किएको छ । एक जना व्यक्ति गोदामभित्र फसेका छन् । यसैबिच, अर्कान्सासमा आँधीबेहरी आपत्कालीन अवस्था जारी गरिएको छ। यहाँ भग्नावशेष हजारौँ फिट माथिसम्म हावामा उडेका थिए ।

मौसम विभागले आगामी दिनहरूमा दक्षिण र मध्यपश्चिममा सम्भावित घातक बाढीको खतराको पनि भविष्यवाणी गरेको छ । राष्ट्रिय मौसम सेवाले आगामी चार दिनमा एक फिट (३० सेन्टिमिटर) भन्दा बढी वर्षा हुने सम्भावना रहेको बताएको छ । ओक्लाहोमास्थित आँधी पूर्वानुमान केन्द्रले टेक्सासदेखि मिनेसोटा र मेनसम्म फैलिएको ठुलो भूभागमा ९ करोडभन्दा बढी मानिसहरू जोखिममा रहेको बताएको छ ।

अर्कान्सासमा आपत्कालीन अवस्था जारी छ । मौसम सेवाले अर्कान्सासमा आपत्कालीन अवस्था जारी गरेको छ । मौसमविद् चेली अमिनका अनुसार आँधीका कारण धुलो र फोहोर २५,००० फिटसम्म फैलिएको थियो ।

आपत्कालीन व्यवस्थापन विभागले २२ काउन्टीहरूमा आँधीबेहरी, तीव्र हावा, असिना र अचानक आएको बाढीले क्षति पुर्‍याएको जनाएको छ । चार जना घाइते भएका छन् । केन्टकीमा पनि आँधीबेहरी आएको छ।प्रहरीले मानिसहरूलाई सहरबाट यात्रा नगर्न आग्रह गरेको छ ।