काठमाडौं । कालीकोटको पलाँता गाउँपालिका–९ थिर्पुबाट खुद्रा तथा खाद्यान्न बोकेर खिनको छलाहा जाँदै गरेको ट्र्याक्टर लार्फ भन्ने ठाउँमा दुर्घटना हुँदा चार जनाको मृत्यु भएको छ ।

गएराति भएको दुर्घटनामा मुगु खत्याड–५ घर भएका २५ वर्षीय चालक चन्द्र प्रकाश रोकाया, पलाँता–५ का २६ वर्षीय अम्बा शाही, पलाँता–४ का २१ वर्षीय सदु बुढा, पलाँता ४ का २१ वर्षीय रविन्द्र बिकको ज्यान गएको जिल्ला प्रहरी कार्यालय कालीकोटका प्रमुख डीएसपी टेक बहादुर रावतले जानकारी दिए ।

दुर्घटनाग्रस्त ट्याक्टर सडकभन्दा तल अप्ठ्यारो भीरमा अड्किएको छ । शव भने सडकभन्दा करिब २०० मिटर तल भेटिएको थियो ।

प्रहरी सहायक निरीक्षक भीमबहादुर सुनारको कमान्डमा प्रहरी टोली राति नै घटनास्थल पुगेको थियो ।