काठमाडौं। त्रिभुवन अन्तर्राष्ट्रिय विमानस्थलको अध्यागमन क्षेत्रभित्र खादा, माला, टोपी, ब्याचलगायत कुनै पनि चिन्हयुक्त पोसाक वा सामग्रीको प्रयोगमा प्रतिबन्ध लगाइएको छ।

बुधवार जारी गरिएको सूचना अनुसार, अध्यागमन कार्यालयले विमानस्थलको संवेदनशीलता र सुरक्षा कारण देखाउँदै यस्तो निर्णय लिएको जनाएको छ। अबदेखि यात्रुहरू तथा ट्राभल एजेन्सी वा म्यानपावर कम्पनीका प्रतिनिधिहरूले अध्यागमन काउन्टरमा यस्ता वस्तुहरू प्रयोग गर्न नपाउने स्पष्ट गरिएको छ।

कार्यालयका अनुसार, यस्तो निर्णय सम्पूर्ण यात्रु, ट्राभल एजेन्सी तथा म्यानपावर कम्पनीहरूमा समान रूपमा लागू हुनेछ। अध्यागमन प्रक्रियाका बेला कुनै पनि प्रकारका सजावटी वा पहिचान झल्काउने वस्तु प्रयोग गर्न नपाइने प्रस्ट गरिएको छ।

यसले अध्यागमन प्रक्रिया थप सहज, व्यवस्थित र सुरक्षित बनाउने अपेक्षा गरिएको छ। यस्ता सामग्रीले प्रक्रिया ढिलाइ गर्न सक्ने र सुरक्षा जोखिम बढाउने देखिएकाले नयाँ नियम लागू गरिएको हो।