काठमाडौं । हाल मनसुनको न्यूनचापीय रेखा सरदर स्थानभन्दा दक्षिणमा छ । अरब सागरबाट जलवाष्पयुक्त हावाको प्रवाह रहेको जल तथा मौसम विज्ञान विभागले बताएको छ ।

देशका केही स्थानमा आज भारी वर्षाको सम्भावना छ । बागमती र सुदूरपश्चिम प्रदेशमा भारी वर्षाको सम्भावना छ ।

दिउँसो देशभर साधारणतया बदली रहनेछ । कोसी, बागमती, लुम्बिनी र सुदूरपश्चिम प्रदेशका केही स्थानमा र बाँकी पहाडी तथा तराई भूभागका थोरै स्थानमा मध्यम वर्षाको सम्भावना छ ।

बागमती र सुदूरपश्चिम प्रदेशका एकदुई स्थानमा भारी वर्षाको सम्भावना छ ।

“काठमाडौंमा आज बदली हुनेछ । १२ बजेपछि हल्का वर्षाको सम्भावना छ,” मौसमविद् प्रतिभा मानन्धर भन्छिन्, “दिउँसो र राति नै काठमाडौं बदली भएर हल्का वर्षाको सम्भावना छ ।”

विभागले राति देशभर साधारणतया बदली रहने बताएको छ । सुदूरपश्चिम प्रदेशका केही स्थान, बागमती, गण्डकी र लुम्बिनी प्रदेशलगायत बाँकी प्रदेशका पहाडी भूभागका थोरै स्थानमा मध्यम वर्षाको सम्भावना छ । बाँकी तराई क्षेत्रका एकदुई स्थानमा पनि मध्यम वर्षाको पूर्वानुमान छ ।