वासिङ्टन । अमेरिकी राष्ट्रपति डोनाल्ड ट्रम्पद्वारा साउदी क्राउन प्रिन्स मोहम्मद बिन सलमानको सम्मानमा आयोजित भव्य रात्रिभोजमा फुटबल सुपरस्टार क्रिस्टियानो रोनाल्डो र उद्योगपति एलन मस्क पनि उपस्थित भएका थिए ।

अमेरिका भ्रमणमा रहेका साउदी राजकुमारका लागि ह्वाइट हाउसमा गरिएको उक्त रात्रिभोज चर्चित व्यक्तित्वको उपस्थितिका कारण झनै ध्यानाकर्षक बन्यो । साउदी क्लब अल नासरका लागि खेल्दै आएका र जो धेरै जना वरिष्ठ खेलाडीसँगै साउदी अरबको आकर्षक प्रस्तावका कारण त्यहाँ पुगेका रोनाल्डोको सम्झौता यसै गर्मीमा समाप्त हुँदैछ ।

४० वर्षीय रोनाल्डो राष्ट्रपति र साउदी क्राउन प्रिन्स प्रवेश गर्नु केही क्षणअघि नै ट्रम्पको टेबल नजिकै आफ्नो सिटमा बसेकाे देखिन्थ्यो । राष्ट्रपति ट्रम्पले रात्रिभोजको भाषणमा भने, “तपाईलाई थाहा छ, मेरा छोरा ब्यारन रोनाल्डोका ठुला प्रशंसक हुन् ।” १९ वर्षीय ब्यारनले दिग्गज खेलाडीलाई भेट्न पाउँदा निकै उत्साहित भएको राष्ट्रपति ट्रम्पले बताए । उनले हाँस्दै थपे, “मलाई लाग्छ, अब उसले आफ्नो बुवालाई अलिक बढी सम्मान गर्छ, किनकी मैले उसलाई जसको परिचय गराएँ, त्यो कारणले ।”

रात्रिभोजमा उपस्थित खेल सम्बन्धित अर्को प्रमुख व्यक्तित्व थिए- फिफाका अध्यक्ष जियानी इन्फान्टिनो । इन्फान्टिनो सन् २०२६ को विश्वकप (संयुक्त राज्य अमेरिकासहितका राष्ट्रले सह-आयोजना गर्ने) को तयारीकै क्रममा पुनः ह्वाइट हाउस पुगेका हुन् । रोनाल्डोले आइतबार पोर्चुगलले विश्वकपमा आफ्नो स्थान सुरक्षित गरेसँगै आगामी प्रतियोगिता ‘निश्चितरूपमा आफ्नो अन्तिम’ हुने बताएका छन् ।

समारोहमा कालो-टाई पोशाकमा उपस्थित एलन मस्क पनि निकै चर्चा बटुल्ने पाहुना थिए । उनी र राष्ट्रपति ट्रम्पबिच गत जुलाईमा सार्वजनिक रूपमा मतभेद बढेपछि सम्बन्ध चिसिएको थियो । मस्कले सरकारी दक्षता विभाग (डिओजिई) अन्तर्गत लागत कटौती विभाग प्रमुखका रूपमा पाँच महिना काम गरेका थिए । साथै उनी गत मे महिनामा साउदी अरब भ्रमणमा पनि राष्ट्रपति ट्रम्पसँगै सहभागी भएका थिए ।

तर ट्रम्पको ‘ठुलो र सुन्दर’ (बिग ब्युटिफुल) खर्च विधेयकको मस्कले गरेको आलोचना तथा एपस्टेन सम्बन्धी फाइलका विषयमा टिप्पणीपछि दुवैबिच सम्बन्ध चिसिएको थियो । त्यति बेला राष्ट्रपति ट्रम्पले मस्कलाई देश निकाला गर्ने धम्कीसमेत दिएका थिए । यद्यपि, उक्त रात्रिभोजमा टक्सेडोधारी मस्कलाई अन्य पाहुनासँगै क्यान्डललिट टेबलमा सहजरूपमा कुराकानी गरिरहेको देखिन्थ्यो, यद्यपि उनी राष्ट्रपति ट्रम्पको टेबलमा भने थिएनन् ।

रात्रिभोजका क्रममा राष्ट्रपति ट्रम्पले सन् २०१८ मा असन्तुष्ट पत्रकार जमाल खशोग्जीको हत्या सम्बन्धी विवादमा साउदी क्राउन प्रिन्सको पक्षसमेत लिए । उनले राजकुमार मोहम्मद बिन सलमानलाई ‘नेतृत्वको व्यक्तित्व’ भन्दै प्रशंसा गरे ।