लन्डन । म्यानचेस्टर सिटी सन् २००९-१० देखि २०१७-१८ सम्मका सिजनहरूमा प्रिमियर लिगको आर्थिक नियमहरूको गम्भीर उल्लङ्घन गरेको सम्बन्धी सबै आरोपमा दोषी पाइएको छ। प्रिमियर लिगले एक विज्ञप्ति जारी गर्दै यसको जानकारी दिएको हो।

चार वर्ष लामो अनुसन्धानपछि सन् २०२३ को फेब्रुअरीमा सिटीमाथि ती नौ सिजनहरूमा लिगको आर्थिक नियम उल्लङ्घन गरेको आरोप लगाइएको थियो। यद्यपि, क्लबले विज्ञप्ति जारी गर्दै उक्त निर्णयविरुद्ध पुनरावेदन (अपिल) गर्ने जनाएको छ।

प्रिमियर लिगले मङ्गलबार जनाएअनुसार, एक स्वतन्त्र आयोगले म्यानचेस्टर सिटीले आफ्ना केही व्यावसायिक साझेदारहरूसँग ‘नक्कली’ सम्झौताहरू गरेको फेला पारेको छ। यी सम्झौताहरूले दुवै पक्षबीचको वास्तविक सहमतिलाई गलत रूपमा प्रस्तुत गरेका थिए।

आयोगका अनुसार सिटीले वित्तीय नियमहरूको पालना गरेको देखाउनका लागि सो अवधिमा क्लबको आम्दानी कृत्रिम रूपमा बढाएको र खर्च घटाएको (९०० मिलियन पाउन्ड वा १.२ अर्ब डलरभन्दा बढीले) पाइएको छ।

प्रिमियर लिगका प्रमुख कार्यकारी रिचर्ड मास्टर्सले भने, “मुख्य निर्णयमा क्लबले कसरी झन्डै एक दशकसम्म व्यवस्थित रूपमा प्रिमियर लिगका नियमहरू उल्लङ्घन गर्‍यो भन्ने विवरण समेटिएको छ, यस मुद्दाका केही पक्षहरूमा अझै निर्णय हुन बाँकी छ; जसमा मुख्य रूपमा यी उल्लङ्घनहरूका लागि कस्तो कारबाही वा सजाय हुनेछ भन्ने विषय समावेश छ।”

यता, कुनै पनि गलत काम नगरेको दाबी गर्दै आएको सिटीले आयोगको निष्कर्षबाट आफूहरू “निराश र आश्चर्यचकित” भएको बताएको छ। क्लबले भनेको छ, “प्रिमियर लिगद्वारा लगाइएका आरोपहरूमा क्लब निर्दोष छ र यस मुद्दामा हाम्रो अडानलाई समर्थन गर्ने अकाट्य प्रमाणहरूको विस्तृत आधार विद्यमान छ, म्यानचेस्टर सिटी एफसीले अब उपलब्ध पुनरावेदनका विकल्पहरू प्रयोग गर्नेछ; किनकि उक्त निष्कर्षमा कानुन, सिद्धान्त र तथ्यसम्बन्धी स्पष्ट तथा ठोस त्रुटिहरू छन् र यो निर्णय आधारहीन छ।”

आयोगको अनुसन्धान अनुसार म्यानचेस्टर सिटीले यस्ता व्यावसायिक सम्झौताहरू गरेको फेला परेको छ, जसमा प्रायोजक कम्पनीहरूले सम्झौता रकमको केही अंश मात्र भुक्तानी गर्दथे। बाँकी रकम क्लबको स्वामित्व रहेको संस्था ‘अबू धाबी युनाइटेड ग्रुप इन्भेस्टमेन्ट एण्ड डेभलपमेन्ट’ ले व्यहोर्ने गरेको थियो।

उक्त समूहद्वारा वित्तपोषित यस्ता व्यवस्थाहरूका कारण क्लबलाई आफ्नो वास्तविक सञ्चालन खर्चभन्दा कम खर्च विवरण देखाउन सहज भएको थियो। आयोगले यदि सिटीले सही र वास्तविक विवरण पेस गरेको भए उनीहरूले खर्चको तोकिएको सीमा “अत्यधिक ठूलो परिमाणमा” नाघ्ने निष्कर्ष निकालेको छ।

यसका साथै, अनुसन्धानका क्रममा क्लबले “प्रिमियर लिगको कार्यमा बाधा पुर्‍याउन र छानबिन रोक्न योजनाबद्ध प्रयासहरू गरेको” पनि पाइएको छ। बेलायती सरकारकी संस्कृति, सञ्चार तथा खेलकुद मन्त्री लिसा नान्डीले भनिन्, “यो अत्यन्त गम्भीर विषय हो; प्रिमियर लिगको प्रतिवेदन निकै कडा र गम्भीर छ।”

संयुक्त अरब इमिरेट्स (युएई) का उपराष्ट्रपति तथा उपप्रधानमन्त्री शेख मन्सुर बिन जायद अल-नाह्यानले सन् २००८ मा क्लबको स्वामित्व लिएयता म्यानचेस्टर सिटी प्रिमियर लिगको एक प्रभावशाली शक्तिका रूपमा स्थापित भएको छ। यस अवधिमा (विगत १५ वर्षमा) सिटीले आठवटा प्रिमियर लिग, चारवटा एफए कप र सातवटा लिग कप उपाधि जितेको छ। साथै, क्लबले सन् २०२३ मा पहिलो पटक प्रतिष्ठित च्याम्पियन्स लिगको उपाधिसमेत चुमेको थियो।