काठमाडौं । गुलशन झाको शतकमा नेपाली यू–१९ क्रिकेट टोलीले स्कटल्यान्ड यू–१९ टोलीमाथि सहज जित निकालेको छ । सोमबार राति भएको खेलमा नेपालले स्कटल्यान्डलाई १३५ रनले हराएको हो ।

दक्षिण अफ्रिकामा नेपालले दिएको २८५ रनको लक्ष्य पछ्याएको स्कटल्यान्डले ४३ ओभर २ बलमा सम्पूर्ण विकेट गुमाउँदै मात्र १४९ रन बनायो ।

स्कटल्यान्डका लागि उजिर अहमदले सर्वाधिक २८ रन बनाए । त्यस्तै खानले २४ रन बनाए । नेपालका लागि तिलक भण्डारीले तीन विकेट लिए । त्यस्तै आकाश चन्दले दुई विकेट लिए ।

यसअघि पहिले ब्याटिङ गरेको नेपालले ४९ ओभर २ बलमा सम्पूर्ण विकेट गुमाउँदै २८४ रन बनाएको थियो । नेपालका लागि गुलशन झाले शतकीय पारी खेले । उनले ११५ बलमा ११४ रन बनाए ।

नेपालका लागि दिपक बोहोराले ५८ रनको अर्धशतकीय पारी खेले । नेपाली टोली अहिले दक्षिण अफ्रिकामा विश्वकपको तयारीमा रहेको छ ।

आउँदो जनवरी १९ देखि शुरु हुने १९ वर्षमुनिको विश्व कपमा नेपाल समूह ‘डी’ रहेको छ ।

नेपालको समूहमा न्युजिल्यान्ड, पाकिस्तान र अफगानिस्तान छन् । नेपालले पहिलो खेल जनवरी २१ तारिखमा न्युजिल्यान्डसँग, दोस्रो खेल जनवरी २४ मा पाकिस्तानसँग र समूहको अन्तिम खेल जनवरी २६ तारिखमा अफगानिस्तानसँग खेल्नेछ ।

विश्व कप अघि नेपालले जनवरी १३ मा स्कटल्यान्ड र जनवरी १६ मा वेस्टइन्डिजसँग अभ्यास खेल खेल्नेछ ।