पाेखरा । नेपाल पुलिस क्लबलाई हराउँदै चर्च ब्वाइज क्लब २३औँ आहा रारा गोल्डकपको सेमिफाइनलमा प्रवेश गरेको छ ।

मंगलबार पोखरा रंगशालामा भएको खेलमा विभागीय टिम पुलिस क्लबलाई १-० गोलअन्तरले पराजित गर्दै चर्च ब्वाइज सेमिफाइनलमा प्रवेश गरेको हो ।

पहिलो हाफ गोलरहित बराबरीमा सकिएको खेलमा चर्च ब्वाइजले दोस्रो हाफमा गोल गर्दै सेमिफाइनलको यात्रा तय गरेको हो । चर्च ब्वाइजको जितमा समिर तामाङ नायक बने । खेलको ७२औँ मिनेटमा समिरले गरेको गोल नै निर्णायक बन्यो ।

चर्च ब्वाइजले अब फाइनल प्रवेशका लागि विभागीय टिम त्रिभुवन आर्मी क्लबको सामना गर्नेछ । बुधबार हुने पहिलो सेमिफाइनलमा थ्रीस्टार क्लबले जावलाखेल युथ क्लबको सामना गर्नेछ ।