गलकोट । निर्माण व्यवसायीले समयमै काम सकेको भए बागलुङ नगर अस्पताल भवन निर्माण भइसकेर यतिबेला सेवा दिइरहेको हुन्थ्यो । तर २ पटक म्याद थपेर पनि अहिलेसम्म भवनको काम ५० प्रतिशतमात्रै प्रगति भएको छ ।

बागलुङ नगरपालिका–१३ पैँयुपाटामा निर्माणाधीन १५ शय्याको बागलुङ नगर अस्पताल २ वर्षभित्र बनाउन ०७८ मा सम्झौता भएको थियो । बागलुङ नगरपालिकाका इन्जिनियर सोविन घर्तीका अनुसार २०८० असार २० गते निर्माण सकेर हस्तान्तरण गर्नेगरी सम्झौता भए पनि काम आधा अधुरै छ । अस्पताल बनाउन थालेको ३ वर्ष भइसक्दा पनि भवनको दोस्रो ढलानमात्रै सकिएको छ ।

निर्माण व्यवसयीले भुक्तानी समयमै नपाएको, कच्चा सामग्री आयातमा सडकको अवरोध रहेका कारण निर्माणमा ढिलाइ भएको जनाउँदै आए पनि दुई पटक मिति थप्दासमेत भवन निर्माण आधा मात्रै सकिएको इन्जिनियर सोबिन घर्तीले बताए । बागलुङ नगरपालिकाले नयाँ भवन निर्माणका लागि १२ करोड ८७ लाख रुपैयाँमा श्री महालक्ष्मी जुगल जेभीसँग २०७८ असार २३ गते सम्झौता गरेको थियो ।

‘१५ श्याको नगर अस्पताल भवन निर्माणमा ढिलाइ भएको छ, २०८० असारमा म्याद सकिएको थियो, एक वर्षलाई थपेको म्याद सकियो, पुनः एक वर्षलाई दोस्रोपटक म्याद थपिएको छ, काम बल्ल ५० प्रतिशत भएको छ, एकतला अझै ढालन गर्न बाँकी छ’, घर्तीले भने ।

स्वास्थ्य चौकीलाई स्तरोन्नति गरी नगर अस्पताल बनाएर सेवा दिए पनि भवन अभावले समस्यामा परेको स्थानीय बालकृष्ण शर्माले बताए । निर्माण व्यवसायीलाई ताकेता गरिरहेको बताउँदै वडा नं १३ का वडाध्यक्ष नारायण पौडेलले असारभित्रै अन्तिम तला ढलानको तयारी गरे पनि सडक मार्ग अवरुद्ध भएपछि कामदारले अस्पताल निर्माणको काम छाडेर घर गएको बताए ।

निर्माण व्यवसायीको ढिलासुस्तीका कारण अस्पताल भवन निर्माण कहिले सकिने टुंगो नलागेको वडाध्यक्ष पौडेलले जानकारी दिए । ‘बागलुङ नगरपालिकाको बलेवा क्षेत्र सदरमुकामको पहुँचबाट टाढा भएका कारण नगर अस्पताल यही बनाउने गरी काम थालेको थियो, ३ वर्षमा आधा काम हुँदा अझै कति वर्ष लाग्छ भन्ने जनतालाई आशंका छ’, वडाध्यक्ष पौडेलले भने ।

सरकारले प्रत्येक पालिकामा १५, १० र ५ शय्याको आधारभूत अस्पताल निर्माण गर्ने लक्ष्यअनुसार नगर अस्पताल निर्माण थालिएको थियो । अस्पतालको प्रवेशद्वार, पार्किङलगायत संरचनासहित तीन तलाको विद्युतीय भर्‍याङसहितको अस्पताल निर्माण गर्ने सम्झौतामा उल्लेख छ ।

निर्माण व्यवसायका प्रतिनिधि नरेश ओझाले समयमै भुक्तानी नहुँदा र सडक बन्द हुँदा निर्माणमा ढिलाइ भएको दाबी गरे । साढे दुई करोड भुक्तानी गर्न राज्यले बाँकी रहेको बताउँदै भुक्तानी पाउँदासाथ काम गरेर सक्ने उनको भनाइ छ ।

बागलुङ नगरपालिकाको रायडाँडा, पैँयुपाटा, अमलाचौर र नारायणस्थनका बासिन्दालाई अस्पताल निर्माणसँगै स्वास्थ्य सेवा लिन सहज हुनेगरी नगर अस्पताल घोषणा गरेर सेवा दिन थाले पनि भवन निर्माणमा ढिलाइ हुँदा पूर्ण सेवा दिन नसकिएको हो ।