काठमाडौं । काठमाडौं महानगरपालिका वडा नं. ११ मा रहेको विवादस्पद नर्भिक अस्पतालले भाडामा लिएको डेढ रोपनी सरकारी जग्गाको वार्षिक ३७ हजार ९ सय ८९ रुपैयाँ बहाल बुझाउँदै आएको तथ्य सार्वजनिक भएको छ । महानगरपालिकाले सार्वजनिक जग्गामा बनेको भौतिक संरचना हटाउन सूचना टाँस गरेपछि अस्पतालले भूमिसुधार कार्यालय काठमाडौंसँग गरेको सम्झौता सार्वजनिक गर्दा उक्त तथ्य बाहिर आएको हो । हाल उक्त जग्गाको मूल्य १७ करोड रुपैयाँभन्दा माथि पर्न आउँछ ।

भूमि सुधार कार्यालय काठमाडौंको तर्फबाट लुम्बप्रसाद सिवाकोटीले हस्ताक्षर गरेको उक्त सम्झौताको बुँदा नं. ३ मा भनिएको छ, पहिलो पक्षले जफत गरेको काठमाडौं महानगरपालिका–११ थापाथलीस्थित कि.नं. २०८५ को क्षे.फ. १–८–१–१ जग्गा दोस्रो पक्षले वार्षिक रु. ३७९८९।– सैतिसहजार नौ सय उनानब्बे रुपैयाँ मात्र बुझाउने गरी बहालमा लिने र पहिलो पक्षको अधिनमा रहेको सो जग्गा दोस्रो पक्षलाई उपभोग गर्न दिने उल्लेख छ ।

दोस्रो पक्ष अर्थात् सर्वसाधारणको उपचार पहुँच नपुग्ने नर्भिक अस्पतालले उक्त क्षेत्रफलको जग्गा २०५९ सालदेखि प्रयोग गर्दै आएको सम्झौतामा उल्लेख छ । सम्झौता २०६५ साल जेठ १ गतेदेखि लागू भएको छ । त्यसभन्दा अगाडिको भाडाबापत १ लाख ६२ हजार ४ सय ८६ रुपैयाँ एक मुष्ट दाखिला गर्ने सम्झौतामा उल्लेख छ ।

२० वर्षका लागि लिइएको उक्त जग्गा भाडा सम्झौताको ११ नम्बर बुँदामा हरेक दुई वर्षमा भाडा पुनरावलोकन हुने उल्लेख छ । तर वार्षिक कति रुपैयाँ भाडा वृद्धि गर्ने भन्ने काहिँकतै उल्लेख छैन ।

सरकारी मूल्यांकनअनुसार नर्भिकले भाडामा लिएको उक्त जग्गाको मूल्य प्रतिआना ६६ लाख रुपैयाँ पर्छ । उक्त जग्गा तत्काल सरकारी मूल्यमै बिक्री गर्दा पनि झन्डै १७ करोड रुपैयाँभन्दा माथि हुन आउँछ ।

मालपोत ऐन, २०३४ अनुसार डिल्लीबजार कार्यक्षेत्रमा रजिष्ट्रेशन हुने लिखतमा थैली अङ्क कायम गर्ने प्रयोजनका लागि जग्गाको न्यूनतम मूल्याङ्कन समितिले नर्भिक अस्पताल वरपर क्षेत्रको जग्गालाई प्रतिआना ६६ लाख रुपैयाँ मूल्यांकन गरेको छ । सरकारी निकायबाट भएको मूल्याङ्कनभन्दा बजारमा कारोबार भने दशौँ गुणा बढीमा हुने गरेको पाइन्छ ।

मूल्यांकन समितिले माइतीघर–सिंहदरबार दक्षिण, पश्चिम गेट–पुतलीसडक कृष्ण पाउरोटी हात्तिसार, जयनेपाल कान्तिपथ, जमल दरबारमार्ग र घण्टाघरदेखि कमलादीमोडसम्मका मूलसडकसँग जोडिएका जग्गाको दायाँबायाँको पनि प्रतिआना ६६ लाख रुपैयाँ रहने गरी प्रस्तावित गरिएको छ । त्रिपुरेश्वरसम्मको मूल सडकसँग जोडिएका जग्गाको दायाँबायाँको पनि प्रतिआना रु ६६ लाख नै न्यूनतम मूल्याङ्कन तोकिएको छ ।