काठमाडौं । प्रतिनिधि सभाको बैठक आज बस्दैछ । बैठक दिउँसो १ बजेका लागि बोलाइएको छ । आजको बैठकमा नेपाली कांग्रेसका सांसद प्रदीप गिरीको निधनमा शोक प्रस्ताव पारित गर्ने कार्यसूची रहेको छ । प्रतिनिधि सभाका सचिव गोपालनाथ योगीले सार्वजनिक गरेको सम्भावित कार्यसूचीमा गिरीप्रति श्रद्धाञ्जली अर्पण गर्दै शोक प्रस्ताव पारित गर्ने उल्लेख छ ।

गिरी २०५१ सालको प्रतिनिधि सभा निर्वाचनमा सिरहा जिल्ला क्षेत्र नम्बर ५ बाट पहिलोपटक सांसदमा निर्वाचित भएका थिए । साथै २०६४ र २०७० सालको संविधान सभा निर्वाचनमा समानुपातिक सदस्यमा निर्वाचित सदस्य थिए ।

यस्तै २०७४ सालको प्रतिनिधि सभा निर्वाचनमा सिरहा जिल्ला क्षेत्र नम्बर १ बाट निर्वाचित भएका थिए । घाँटीको क्यान्सरबाट पीडित गिरीको शनिवार राति साढे ९ बजे उपचारको क्रममा मेडिसिटी अस्पतालमा निधन भएको थियो । हिजो राजकीय सम्मानका साथ पशुपति आर्यघाटमा अन्त्येष्टि गरियो ।