मनिला । पश्चिम प्रशान्त महासागरमा यतिबेला एकै पटक चार छुट्टाछुट्टै टाइफुन (समुद्री आँधी) उठिरहेका छन् । हालैका महिनामा एक पछि अर्को गर्दै समुद्री आँधीको चपेटामा आएको फिलिपिन्सका लागि यो निकै खराब समाचार हो ।

प्रशान्तमा एकै पटक चार वटा आँधी विकास भइरहेको यो सन् १९५१ मा यस्तो खालको रेकर्ड राख्न थालेयताकै पहिलो भएको जापानको मौसम विभागले पुष्टि गरेको भन्दै सीएनएनले समाचार छापेको छ ।

एउटै महिनामा यस्तो भएको पनि यो सात वर्षता यताकै पहिलो पटक हो । ज्वाइन्ट टाइफुन वार्निङ सेन्टरको सेटलाइट इमेजले भियतनामदेखि गुआमसम्म पश्चिम प्रशान्त बेसिन चार वटा आँधी उठिरहेको देखाएको छ ।

यी टाइफुन यिनसिङ, तोराजी, उसागी र म्यान–यी बताइएको छ । बर्सेनि फिलिपिन्समा अनेकौँ समुद्री आँधी आउने गरेको छ । तर गएको महिना आएको एक पछि अर्को समुद्री आँधीका कारण हजारौँ मानिस अहिले पनि त्यहाँ आश्रयस्थलमै छन् ।

बिहीबार यिनसिङ ताइफु उत्तरपूर्वी फिलिपिन्समा पुगेको थियो । यस आँधीका कारण कुनै हताहत नभए पनि यसले मुसलधारे वर्षा, आँधी र पहिरो गराएको थियो । शुक्रबार तोराजी टाइफुुनले औरोरा प्रान्तको लुजोन तटलाई हिर्कायो । हजारौँ मानिसलाई आश्रय स्थलमा सारियो । बुधवार बिहान पाँच दिनमा तेस्रो आँधी उसगाई फिलिपिन्स पुगेको छ ।

आँधीबेहरी चल्ने र आगामी ४८ घण्टामा यो झन् बढ्न सक्ने चेतावनी फिलिपिन्सको मौसम विभागले दिएको छ । शुक्रबार बिहानसम्ममा अर्को उष्णकटिबन्धीय आँधी म्यान–यीले उत्तरी फिलिपिन्सलाई प्रभावित बनाउने अपेक्षा गरिएको छ ।

उस्गाई र म्यान–यीले सिधै पहिरो गराउँछ कि गराउँदैन भन्ने कुरा अस्पष्ट छ । तर आँधीबेहरी भने चर्को आउने भनिएको छ ।