सिरियाली सरकार र विद्रोहीबिच द्वन्द्व चर्किदा अलेप्पोमा २०० भन्दा बढीको मृत्यु

सिरियाली सरकार र विद्रोहीबिच द्वन्द्व चर्किदा अलेप्पोमा २०० भन्दा बढीको मृत्यु



दमस्कस । सिरियाली सरकार र विद्रोहीबिच अलेप्पो शहरको बाहिरी इलाका कब्जालाई लिएर द्वन्द्व चर्किएको छ । रुसी लडाकु विमानले सिरियाली सेनासँग मिलेर विद्रोही नियन्त्रित अलेप्पोको पूर्वी क्षेत्रमा लगातार हवाई हमला गरिरहेका छन् ।

यसैबीच जिहादी लडाकुहरूले बिहीबार दमास्कसदेखि अलेप्पोसम्मको राजमार्गमा पहुँच बन्द गरिदिएका छन् । यस आक्रामक अभियानमा २ सय भन्दा धेरै मानिस मारिएका छन् । एक अनुगमनका अनुसार मारिनेमा रुसी वायुसेनाको आक्रमणमा मारिएका सर्वसाधारण पनि छन् ।

एक दिन अघि जिहादी समूह हयात तहरीर अल–शाम (एचटीएस) र यसका सहयोगीहरूले उत्तरी अलेप्पो प्रान्तको सरकारी नियन्त्रणमा रहेका क्षेत्रहरूमा अचानक हमला गरेको सिरियन अब्जर्भेटरी फर ह्युमन राइट्सले भनेको छ । जसका कारण तनावका बिच सबैभन्दा भीषण लडाई सुरु भएको बताइएको छ ।

जारी लडाइँमा मर्नेहरूको सङ्ख्या १८२ पुगेको निगरानीकर्ताले भनेका छन् । मर्नेमा १०२ जना एचटीएस लडाकु, सहयोगी समूहका १९ जना छन् ।सरकारी सेना र सम्बद्ध समूहका ६१ जनाको पनि मृत्यु भएको छ ।

अनुगमन निकायका प्रमुख रामी अब्देल रहमानले बिहीबार अलेप्पोको ग्रामीण इलाकामा रुसी हवाई आक्रमणमा १९ जना सर्वसाधारण मारिएको बताएका छन् । उनले एक दिन अघि सिरियाली सेनाको गोलाबारीमा अर्का सर्वसाधारणको मृत्यु भएको बताए ।