काठमाडौं । दक्षिण कोरियाका राष्ट्रपति युन सुक योलले देशको भ्रष्टाचार निगरानी निकाय समक्ष उपस्थित हुन अस्वीकार गर्नुभएको छ । डिसेम्बर ३ मा सैनिक शासनको अल्पकालीन घोषणापछि संसद्ले उनलाई गएको हप्ता जिम्मेवारीबाट हटाएको थियो ।

भ्रष्टाचार अनुसन्धान कार्यालयका अनुसन्धानकर्ताहरूले राष्ट्रपति युनलाई विद्रोह र शक्तिको दुरुपयोगको आरोपमा सोधपुछका लागि सियोलमा रहेको कार्यालयमा बोलाएकोमा उहाँ अनुपस्थित भएका अन्तर्राष्ट्रिय समाचार संस्था एएफपीले जनाएको छ । राष्ट्रपति युनको कानूनी टोलीले अदालतमा मुद्दा लड्ने प्रतिबद्धता भने जनाएको छ ।

भ्रष्टाचार अनुसन्धान कार्यालयका प्रमुख ओह डोङ–वुनले पक्राउ पुर्जी जारी गर्ने वा नगर्नेबारे पनि ‘छलफल’ भइरहेको बताएका छन् ।

राष्ट्रपति युनमाथि दक्षिण कोरियाली अभियोजकका साथै प्रहरी, रक्षा मन्त्रालय र भ्रष्टाचार विरोधी अनुसन्धानकर्ताहरूको संयुक्त टोलीले अनुसन्धान गरिरहेको छ । राष्ट्रपतिमाथि अहिले पनि अन्तर्राष्ट्रिय यात्रा प्रतिबन्ध छ ।

दक्षिण कोरियाको संवैधानिक अदालतले अस्ति सोमवारदेखि युनविरुद्ध मुद्दा चलाएको छ र महाभियोगलाई कायम राख्ने कि नराख्ने भन्ने विषयमा छुट्टाछुट्टै छलफल गरिरहेको छ ।