कैलाली । लागू औषध मुद्दामा अनुसन्धानको क्रममा हिरासतमा रहेका व्यक्तिलाई थुनामुक्त गरी दिन्छु भनी रकम लिने अभियोगमा ३ जनालाई प्रहरीले पक्राउ गरेको छ ।

पक्राउ पर्नेहरूमा गौरीगंगा नगरपालिका-७ बस्ने २९ वर्षीय रूपक साउद, २२ वर्षीय रमेश साउद र १९ वर्षीय हर्क साउद रहेका छन् ।

प्रहरीका अनुसार लागू औषध मुद्दामा अनुसन्धानको क्रममा जिल्ला प्रहरी कार्यालय कैलालीको हिरासतमा रहेका एक जना थुनुवालाई थुनामुक्त गरी दिन्छु भनी थुनुवाका परिवारका सदस्यहरूबाट रकम लिएको खुलेको छ ।

सोही खबर प्राप्त अनुसार उनीहरूलाई प्रहरीले शुक्रबार पक्राउ गरेको हो । उनीहरूको साथबाट ३९ हजार ५ सय भारतीय रुपैयाँ बरामद पनि गरेको छ ।

हाल पक्राउ परेका तीन जनालाई आवश्यक अनुसन्धान गरिरहेको प्रहरीले जनाएको छ ।