बाकु । हालै काजकस्तानमा भएको अजरबैजान एयरलाइन्सको विमान दुर्घटनाको जिम्मा लिन रुसलाई अजरबैजानका राष्ट्रपति इल्हाम अलियेभले अनुरोध गरेका छन् । क्रिसमसको दिनमा काजकस्तानको अकताउमा ३८ जनाको ज्यान जाने गरी सो विमान दुर्घटना भएको थियो ।

बाकुबाट रुसको चेचन्या क्षेत्रका लागि उडेको विमान रुसको हवाई क्षेत्रभित्र रुसी हवाई रक्षा प्रणालीले प्रहार गरेको मिसाइलको चपेटामा आएको ठानिएको छ । शनिवार रुसी राष्ट्रपति भ्लादिमिर पुटिनले दुर्घटनाको मामिलामा अजरबैजानी राष्ट्रपतिसँग माफी पनि मागेका थिए । तर यस क्रममा उनले दुर्घटनाको जिम्मा भने लिएका थिएनन् ।

दुर्घटनामा रुसी संलग्नताबारे सुरुमा ढाकछोप गरेको आरोप अलियेभको छ । रुसले आफ्नो दोष मानेर क्षतिपूर्ति दिनु पर्नेमा उनले जोड दिएका छन् । विमानमा सवार ६७ जनामध्ये २९ जना बाँच्न सफल भएका थिए ।

इलेक्ट्रोनिक जामिङका कारण विमानको जीपीएस प्रभावित भएको अनि रुसी हवाई रक्षा मिसाइल लागेर विमानमा क्षति पुगेको अनि दुर्घटनामा परेको उड्डयन विज्ञ र अन्यले भनिरहेका छन् ।

शुक्रवार दुर्घटनाको सन्दर्भमा अजरबैजानले रुससँग कयौँ माग राखेको तर यसमध्ये अहिलेसम्म माफी मात्रै पूरा भएको भनिएको छ ।