काठमाडौं । इरानलाई हराउँदै नेपाली महिला टोली खो–खो विश्वकपको सेमिफाइनलमा पुगेको छ । भारतको नयाँ दिल्लीमा रहेको इन्दिरा गान्धी स्टेडियममा आज भएको क्वाटरफाइनलमा नेपालले इरानलाई १०३–८ ले हरायो ।

नेपाल समूह चरणमा अपराजित हुँदै शीर्ष स्थानमा रहेर क्वाटरफाइनलमा पुगेको हो । नेपाली महिला टोलीले समूह चरणमा पहिलो खेलमा भुटान, दोस्रो खेलमा जर्मनी, तेस्रो खेलमा श्रीलंका र चौथो खेलमा बंगलादेशलाई हराएको थियो ।

यस्तै खो–खो विश्वकपको पुरुषतर्फ अहिले नेपालले बंगलादेशसँग खेलिरहेको छ । प्रतियोगितामा भोलि सेमिफाइनलका खेल हुनेछन् भने पर्सि आइतबार फाइनल हुनेछ ।