बेलायती प्रधानमन्त्री केयर स्टारमरले जारी रुस युक्रेन युद्ध अन्त्य गर्न र रुसबाट युक्रेनको रक्षा गर्न चार बुँदे योजना घोषणा गरेका छन् । बेलायत, फ्रान्स र अन्य देशहरूले इच्छुकहरूको गठबन्धन गर्दै आफ्नो प्रयासलाई तीव्र पार्ने छन् र युक्रेनको समर्थनमा अमेरिकालाई सामेल गर्ने प्रयास गरिने जनाइएको छ ।

बेलायतको राजधानी लण्डनमा भएको युरोपेली नेताहरुको शिखर सम्मेलनमा युरोपेली एकतामा जोड दिइएको छ । लामो समयपछि युरोपेली एकता उच्च स्तरमा देखिएको टिप्पणी गरिएको छ ।

युरोपका १८ नेताहरु सहभागी सम्मेलनमा युक्रेनी राष्ट्रपति भोलोदिमिर जेलेन्स्की पनि सहभागी थिए । जेलेन्स्कीले युरोपबाट बलियो समर्थनको महसुस गरेका छन् । ह्वाइट हाउसमा अमेरिकी राष्ट्रपति र उपराष्ट्रपतिबाट अपमानित भएपछि लण्डन पुगेका जेलेन्स्कीले राहतको महसुस गरेको विश्लेषण गरिएको छ ।