काठमाडौं । प्यालेस्टिनी लडाकू समूह हमासले गाजामा युद्धविरामको नयाँ प्रस्तावमा सहमति जनाएको छ । ५० दिनको युद्धविरामको बदलामा इजरायललाई थप पाँच जना बन्धक रिहा गर्नेसम्बन्धी मध्यस्थकर्ताहरूले प्रस्तुत गरेको प्रस्तावमा हमासले सहमति जनाएको बीबीसीले जनाएको छ ।

हमासका सबैभन्दा वरिष्ठ नेता खलील अल–हयाले मध्यस्थकर्ता कतार र इजिप्टले पठाएको सम्झौताको मस्यौदालाई अनुमोदन गरेको बताउका छन् । इजरायली प्रधानमन्त्री बेन्जामिन नेतान्याहुको कार्यालयले पनि नयाँ प्रस्ताव प्राप्त भएको र अमेरिकासँग पूर्ण समन्वयमा मध्यस्थकर्ताहरूलाई प्रति–प्रस्ताव पेश गरेको बताएको छ । नयाँ सम्झौतामा दुवै पक्ष सहमत भए ईदमा कार्यान्वयन गर्न सकिने खबरमा उल्लेख छ ।

इजरायली सेनाले गाजामा दैनिक हवाई आक्रमण र रफाहमा स्थलगत कारबाही गरिरहेका बेला नयाँ युद्धविराम सम्झौताबारे छलफल भइरहेको छ ।

हमास र इजरायलबीच जनवरीमा भएको युद्धविराम सम्झौता यसै महिना तोडिएको थियो । यस सम्झौताको पहिलो चरणमा हमासले ३३ जना बन्धकलाई रिहा गरेको थियो । हमासले अझै पनि ५९ जनालाई बन्धक बनाएको विश्वास गरिएको छ तर तीमध्ये कति जीवित छन् भन्ने स्पष्ट भइसकेको छैन ।

हमासले पहिलेको सम्झौता नतोड्न र दोस्रो चरणको वार्ता शुरू गर्न चाहेको थियो । दोस्रो चरणमा प्यालेस्टिनी बन्दीहरूको सट्टामा जीवित बन्धकहरूलाई रिहा गर्ने र गाजाबाट इजरायली सेनाको पूर्ण फिर्ती समावेश थियो । तर यस विषयमा वार्ता शुरू हुन सकेन ।

यसको बदलामा इजरायल र अमेरिकाले एक महिनाअघि म्याद सकिएको पहिलो चरणको युद्धविराम लम्ब्याउन प्रस्ताव गरेका थिए । तर इजरायलले भने हमासले यो प्रस्तावलाई स्वीकार नगरेको आरोप लगाउँदै फेरि आक्रमण शुरू गरेको हो ।