काठमाडौं । अवैध आप्रवासीको खतरासँग जुध्न बेलायतमा आजदेखि दुई दिने अन्तर्राष्ट्रिय सम्मेलन शुरू हुने भएको छ । सम्मेलनमा ४० वटाभन्दा धेरै देशका प्रतिनिधि सहभागी हुने बीबीसीले जनाएको छ ।

सम्मेलनमा बेलायती प्रधानमन्त्री किअर स्टार्मरले मानव बेचबिखन गर्ने गिरोहलाई रोक्न र देशहरूबीच आपसी सहयोग बढाउनमा जोड दिनु हुनेछ । आप्रवासीको एजेन्डामा गर्न लागिएको यो पहिलो सम्मेलन मानिएको छ । यस सम्मेलनको उद्देश्य गैरकानूनी आप्रवासनको समाधान खोज्नु र अन्तर्राष्ट्रिय सहयोगलाई सुदृढ गर्नु रहेको खबरमा उल्लेख छ ।

बेलायती सरकारका लागि आप्रवासीको मुद्दा निकै महत्त्वपूर्ण छ । विपक्षी दल कन्जर्भेटिभ र रिफर्म यूकेले सत्तारूढ लेबर पार्टीले यस समस्यालाई राम्ररी समाधान गर्न असफल भएको आरोप लगाएका छन् ।

बैठकअघि बेलायत सरकारले मानव बेचबिखन रोक्न र यस अपराधमा संलग्नलाई कडा कारबाही गर्न ३३ मिलियन पाउन्ड खर्च गर्ने घोषणा गरेको छ ।

यस सम्मेलनमा भियतनाम, अल्बानिया र इराकजस्ता देशका अधिकारीहरू सहभागी हुनेछन् जहाँबाट ठूलो सङ्ख्यामा आप्रवासीहरू बेलायत आउने गरेका छन् । यसका साथै फ्रान्स, चीन र अमेरिकाका प्रतिनिधिको पनि सहभागिता रहनेछ ।