वासिङ्टन डीसी । चीनले अमेरिकाबाट आउने सामानमा लगाएको १२५ प्रतिशत ट्यारिफ अर्थात् अतिरिक्त भन्सार महसुलको जवाफमा अमेरिकाले उल्टै २४५ प्रतिशत ट्यारिफ लगाएको छ । अमेरिका विरुद्धको प्रतिशोधात्मक कारबाहीका कारण चीनले अब २४५ प्रतिशतसम्मको भन्सार शुल्कको सामना गर्नुपर्नेछ भनेर ह्वाइट हाउसको तर्फबाट जारी गरिएको एक दस्ताबेजमा भनिएको छ ।

अमेरिकी राष्ट्रपति डोनाल्ड ट्रम्पले आयातित खनिज र त्यसबाट बनेका उत्पादनहरूमा अमेरिकाको निर्भरताले निम्त्याउने राष्ट्रिय सुरक्षा जोखिमहरूको अनुसन्धान गर्न कार्यकारी आदेशमा हस्ताक्षर गरेपछि यो जानकारी प्रकाशमा आएको हो ।

उक्त दस्तावेजमा ‘विदेशी महत्त्वपूर्ण खनिजहरूमा अत्यधिक निर्भरता र तिनीहरूका निम्नस्तरका उत्पादनहरूले अमेरिकी रक्षा क्षमता, पूर्वाधार विकास र प्राविधिक नवप्रवर्तनलाई खतरामा पार्न सक्छ’ भन्ने ट्रम्पको दाबीलाई उद्धृत गरिएको छ । ट्रम्पले सबै देशहरूमा १० प्रतिशत भन्सार लगाएको र अमेरिकाको सबैभन्दा ठुलो व्यापार घाटा भएका देशहरूमा पारस्परिक रूपमा उच्च भन्सार लगाएको पनि यसमा भनिएको छ ।

७५ भन्दा बढी देशहरूले नयाँ व्यापार सम्झौताहरूमा छलफल गर्न पहिले नै सम्पर्क गरिसकेको र फलस्वरूप छलफल जारी रहँदासम्म व्यक्तिगत रूपमा उच्च भन्सार शुल्कहरू स्थगित गरिएको ह्वाइट हाउसले बताएको छ । यद्यपि, चीनले बदला लिएको छ र प्रतिशोधात्मक कारबाहीको परिणामस्वरूप अमेरिकामा आयात हुने चिनियाँ सामानमा २४५ प्रतिशतसम्मको भन्सार शुल्कको सामना गर्न बताइएको छ ।

चीनले केही महिनाअघि अमेरिकामा सैन्य प्रयोगको सम्भावना भएका ग्यालियम, जर्मेनियम, एन्टिमोनी र अन्य प्रमुख उच्च–प्रविधि सामग्रीहरूको निर्यातमा प्रतिबन्ध लगाएको थियो । यसहप्ता उसले फेरि ६ वटा निकै दुर्लभ धातुका साथै दुर्लभ चुम्बकहरूको निर्यात रोकेको पनि दस्ताबेजमा उल्लेख गरिएको छ ।

यो कार्य विश्वभरका अटोमेकर, एयरोस्पेस निर्माताहरू, स्वचालित प्रविधि निर्माता कम्पनी र सैन्य ठेकेदारहरूलाई महत्त्वपूर्ण कम्पोनेन्टको आपूर्ति रोक्न लक्षित भएको ह्वाइट हाउसको दाबी छ ।