बेइजिङ । अहिले आफू अमेरिकाले व्यापार वार्ता सुरु गर्न दिएको प्रस्तावको मूल्यांकन गरिरहेको चीनले बताएको छ । यसलाई व्यापार वार्ताको ढोका खुल्ने सङ्केतको रूपमा हेरिएको छ ।

अमेरिकाले हालै चीनलाई सम्बन्धित पक्षबाट चीनसँग व्यापार वार्ता सुरु गर्न आशावादी रहेको भन्दै कयौँ सन्देश पठाएको र चीनले पनि यी प्रस्तावहरूको मूल्यांकन गरिरहेको चीनको वाणिज्य मन्त्रालयका एक प्रवक्ताले शुक्रबार विज्ञप्तिमा भनेका थिए ।

यसलाई चीन अमेरिकाप्रति केही लचिलो भएको सङ्केतको रूपमा हेरिएको छ । यस अघि अमेरिकी राष्ट्रपति डोनाल्ड ट्रम्पले आफ्नो प्रशासनले चीनसँग व्यापार वार्ता गरिरहेको बारम्बार भने पनि चीनले ती दाबी ठाडै अस्वीकार गर्दै ट्यारिफ पूरै नहटाएसम्म व्यापार वार्ता नगर्ने अडान लिएको थियो ।

शुक्रबार चीनले पहिलो पटक वार्ताको कुरा गरेको छ । तर व्यापार वार्ताका लागि केही पूर्वत सर्त पूरा गर्नु पर्ने उसको अडान कायमै छ ।

‘ट्यारिफ र व्यापार युद्ध अमेरिकाले एकतर्फी ढंगले सुरु गरेको थियो, र उसले वार्ता गर्न चाहेको हो भने साँच्चैको गम्भीरता देखाउनै पर्छ, यसमा उसले गरेको गलत काम सच्याउने र एकतर्फी रूपमा मनोमानी ढंगले लगाइएका ट्यारिफ पनि रद्द गर्नु पर्छ’ प्रवक्ताले भनेका थिए ।

गएको महिनाको शुरुमा अमेरिकाले चीनबाट आउने सामानमा १४५ प्रतिशत ट्यारिफ लगाएपछि अमेरिका र चीनबिचको व्यापार धरापमा परेको छ ।

केही चिनियाँ व्यवसायीका लागि अमेरिकासँग व्यापार गर्न सकस भइरहेको छ । जस्तालाई त्यस्तै गर्ने नीति चर्किदै गर्दा चीनले पनि अमेरिकाबाट आउने सामानमा १२५ प्रतिशत अतिरिक्त भन्सार महसुल लगाएको छ ।