काठमाडौं । मे १२ मा भएको ‘अपरेसन सिन्दूर’ बारे भारतीय सैन्य महानिर्देशकहरूको प्रेस ब्रिफिङमा भारतको बलियो वायु रक्षा प्रणालीले पाकिस्तानका धेरै ड्रोन र मिसाइल आक्रमणहरूलाई विफल पारेको दाबी गरिएको थियो ।

एयर अपरेसनका महानिर्देशक, एयर मार्सल एके भारतीले भने, ‘हाम्रोतर्फ, वायु रक्षा प्रणाली देशको लागि पर्खाल जस्तै उभिएको थियो र शत्रुलाई यसमा प्रवेश गर्न असम्भव थियो ।’

यसक्रममा भारतीले चिनियाँ निर्मित मिसाइल पीएल–१५ को पनि उल्लेख गरे । ‘यी हिस्सा चिनियाँ मिसाइल पीएल–१५ का हुन सक्छन्,’ केही तस्बिरहरू देखाउँदै उनले दाबी गरे ।

पाकिस्तानले भारतमाथि गरेको आक्रमणमा प्रयोग गरिएको चीनको पीएल–१५ मिसाइल आफ्नो लक्ष्यबाट चुकेको पनि उनले बताए । ‘हाम्रो लडाई आतङ्कवाद र आतङ्ककारीहरू विरुद्ध थियो । त्यसैले मे ७ मा हामीले आतङ्कवादी लुक्ने ठाउँहरूमा मात्र आक्रमण गर्‍यौ,’ भारतीले भने ।

‘तर दुर्भाग्यवश पाकिस्तानी सेनाले आतंककारीहरूलाई समर्थन गर्नु उचित ठाने र यो लडाइँलाई आफ्नै लडाई बनाए । यस अवस्थामा, हाम्रो जवाफी कारबाही अत्यन्त आवश्यक थियो र यसमा उनीहरूले जे पनि क्षति बेहोरेका छन् त्यसको जिम्मेवार उनीहरू आफैँ हुन्,’ अझ अगाडि उनले भने ।

देशका सबै सैन्य अड्डाहरू, सबै प्रणालीहरू पूर्ण रूपमा सञ्चालनमा रहेको र भविष्यमा आवश्यक परेमा कुनै पनि मिसन पूरा गर्न तयार रहेको पनि भारतीले बताए ।