मस्को । रुसमा युक्रेनी ड्रोन आक्रमणका कारण मस्को विमानस्थलहरू बन्द गरिएका छन् । रातभर युक्रेनी ड्रोन आक्रमणका कारण मस्कोका विमानस्थलहरू बन्द गरिएको रुसी अधिकारीहरू र राज्य सञ्चालित मिडियाले खबर छापेका छन् ।

मस्कोको भ्नुकोभो, डोमोडेडोभो र झुकोभस्की विमानस्थलहरूमा हवाई सेवा सञ्चालन रोकिएको छ ।

मस्कोका मेयर सर्गेई सोब्यानिनका अनुसार रुसी हवाई प्रतिरक्षाले मस्कोतर्फ उडिरहेका ६ वटा ड्रोनलाई खसालेका थिए । स्थानीय समयअनुसार बिहान २ः ४१ बजे थप तीन वटा ड्रोन खसालिएको सोब्यानिनले बताए । आपत्कालीन सेवाहरू घटनास्थलमा काम गरिरहेको र हताहतको कुनै खबर नआएको भनिएको छ ।

युक्रेनले लगातार तीन रातदेखि रुसी भूभागमा ड्रोन आक्रमण जारी राखेको छ । मे २० को साँझ र मे २२ को बिहानको बिचमा आफ्नो भूभागमा ४८५ वटा ड्रोन खसालेको दाबी रुसले गरेको छ ।

रुसमा हवाई यात्रा अवरुद्ध गर्न युक्रेनी ड्रोनहरू प्रयोग गरिँदै आएका छन् । युक्रेनले सयौँ ड्रोन प्रहार गरेको रिपोर्ट गरिएको छ, जसले गर्दा जनवरी १ देखि रुसभरि कम्तीमा २१७ विमानस्थलहरू अस्थायी रूपमा बन्द गरिएको थियो ।