काठमाडौं । साहित्यकार, गायक एवम् संगीतकार गणेश रसिकको निधन भएको छ । ललितपुरको हरिसिद्धिमा रहेको नेपाल क्यान्सर अस्पतालमा उपचारका क्रममा उनको बिहान साढे ११ बजेतिर निधन भएको पारिवारिक स्रोतले जनाएको छ ।

रसिकको शव आज त्रिवि शिक्षण अस्पतालमा राखिनेछ । लन्डनमा रहेकी उनकी छोरी भोलि नेपाल आइपुग्ने भएकाले शिक्षण अस्पतालमा शव राखिने संगीतकार वसन्त मुकारुङले जानकारी दिए ।

भोजपुरको छिनामखुमा २००४ सालमा जन्मिएका रसिक प्रोस्टेट क्यान्सरबाट पीडित थिए । रसिकका ओ याङ्जी नाना, नुनजस्तो बिल्ने जिन्दगीलाई ढाकरमा बोकेर, धेरै सम्झे धेरै हुन्छ, रातो भाले क्वाँया क्वाँया लगायत कालजयी गीत छन् ।

यस्तै क्षितिजलाई छुन खोज्दा कथा सङ्ग्रह, रसिकका गीतहरू गीत सङ्ग्रहलगायत रसिकका प्रकाशित पुस्तहरू छन् ।