काठमाडौं । देशको माटोबाट कक्षमा पुग्ने प्रयासमा अस्ट्रेलियामा निर्मित पहिलो रकेट १४ सेकेन्डको उडानपछि दुर्घटनाग्रस्त भएको छ ।

गिलमोर स्पेस टेक्नोलोजीले प्रक्षेपण गरेको एरिस रकेट देशबाट उडान भर्ने पहिलो अस्ट्रेलियामा डिजाइन र निर्माण गरिएको परिक्रमा प्रक्षेपण यान थियो । यो रकेट साना उपग्रहहरूलाई कक्षमा लैजानका लागि डिजाइन गरिएको समाचार एजेन्सी एपीले जनाएको छ ।

यो रकेट आज बिहान क्वीन्सल्यान्ड राज्यको उत्तरी भागमा रहेको सानो शहर बोवेन नजिकको स्पेसपोर्टबाट परीक्षण उडानका लागि प्रक्षेपण भएको थियो । रकेट दुर्घटनाग्रस्त हुँदा हताहतको कुनै खबर आएको छैन ।

यसैबीच कम्पनीले फेसबुकमा पोस्ट गरेको वक्तव्यमा प्रक्षेपणलाई सफलताका रूपमा स्वागत गरेको छ । गिलमोर स्पेस टेक्नोलोजीजले मे र यस महिनाको शुरूमा रकेटको अघिल्लो प्रक्षेपणहरूको योजना बनाएको थियो तर प्राविधिक समस्या र खराब मौसमका कारण ती कार्यहरू रद्द गरेको थियो ।

कम्पनीका प्रमुख कार्यकारी अधिकृत (सीईओ) एडम गिलमोरले एक विज्ञप्तिमा रकेट लन्चप्याडबाट निस्किएकोमा खुशी भएको बताए ।

गिलमोर स्पेस टेक्नोलोजीजसँग निजी कोषकर्ताहरू छन् र यस महिना एरिस रकेटको विकासका लागि देशको सङ्घीय सरकारबाट ५० लाख अस्ट्रेलियन डलर अनुदान प्राप्त गरेको थियो ।

यसले अस्ट्रेलियामा नयाँ अन्तरिक्ष प्रविधिहरूको विकास र व्यावसायीकरणलाई अगाडि बढाउन सन् २०२३ मा सरकारसँग फर्मको पाँच करोड २० लाख अस्ट्रेलियन डलर अनुदान सम्झौतालाई पछ्याएको थियो ।

एरोस्पेस समाचार प्लेटफर्म नासास्पेसफ्लाइटका अनुसार अस्ट्रेलिया सयौं उप–कक्षीय वाहन प्रक्षेपणको स्थल भएको छ तर अस्ट्रेलियाबाट कक्षमा दुई वटा मात्र सफल प्रक्षेपण भएको छ ।