ढाका । बंगलादेशको अन्तरिम सरकारले पूर्वप्रधानमन्त्री शेख हसिनाको पुरानो सरकारी निवास ‘गणभवन’लाई सङ्ग्रहालयमा परिणत गर्ने निर्णय गरेको छ ।

उक्त सङ्ग्रहालयलाई ‘जुलाई क्रान्ति स्मारक सङ्ग्रहालय’ नाम दिइनेछ । यो सङ्ग्रहालय गत वर्षको हिंसामा मारिएका प्रदर्शनकारीहरूको सम्झनामा बनाउन लागिएको हो ।

बंगलादेशका अन्तरिम सरकार प्रमुख मोहम्मद युनुसको नेतृत्वमा रहेको सरकारले गणभवनलाई शेख हसिनाको ‘कुशासनको प्रतीक’ बताउँदै यसलाई सङ्ग्रहालय बनाउने घोषणा गरेको हो । शेख हसिना सन् २०१० देखि २०२४ अगस्ट ५ सम्म १५ वर्ष यही निवासमा बसेकी थिइन् ।

गत वर्ष उनको सत्ता पल्टिएलगत्तै गणभवनमा तोडफोड र लुटपाट भएको थियो । आक्रोशित भीडले भवनमा आक्रमण गरी साडी, सजावटका सामान, घडी, सोफा, महँगा ह्यान्डब्याग, टेलिभिजन, माछा र महिलाका कपडासमेत लुटेका थिए ।

लुटपाटका तस्बिरहरू सामाजिक सञ्जालमा भाइरल भएका थिए । पछि अधिकारीहरूले लुटिएका सामान फिर्ता भएको दाबी गरेका थिए ।

यो भवन शेख हसिनाका पिता तथा बंगलादेशका प्रथम राष्ट्रपति शेख मुजिबुर रहमानले पुनर्निर्माण गराएका थिए । पहिले यस ठाउँलाई ‘इस्टेट राजबाडी’ भनेर चिनिन्थ्यो । ढाकाको शेर-ए-बांग्ला नगरमा अवस्थित गणभवन संसद् भवनको नजिकै पर्छ र यसलाई बंगलादेश सरकारले राष्ट्र प्रमुखको सरकारी निवासको रूपमा प्रयोग गर्दै आएको थियो ।

बंगलादेशको संस्कृति मन्त्रालयले यस सङ्ग्रहालयको व्यवस्थापनका लागि २०० पद सिर्जना गर्ने प्रस्ताव गरेको छ ।