नयाँ दिल्ली । भारतबाट अमेरिका भित्रिने सामानमा अमेरिकाले लगाइरहेको अतिरिक्त भन्सार महसुल (ट्यारिफ)को विषयमा यतिबेला भारत–अमेरिकाबिच तनाव चरम सीमामा छ । यसैबिच, अमेरिकी राष्ट्रपति डोनाल्ड ट्रम्पले दुई देशबीच चलिरहेको व्यापार वार्ताबारे ठूलो बयान दिएका छन् ।

‘भारतबाट आउने सामानमा ५० प्रतिशत ट्यारिफ लगाइसकेपछि व्यापार वार्ता अगाडि बढ्ने आशा गर्नु हुन्छ ?’ भनेर उनलाई पत्रकारहरूले सोधेका थिए । यसो हुनेमा ट्रम्पले अस्वीकार व्यक्त गरे । जब सम्म यो मुद्दा समाधान हुँदैन तबसम्म यस्तो हुने कुनै आशा नभएको उनको जवाफ थियो ।

केही दिन अघि ट्रम्पले भारतमाथि २५ प्रतिशत अतिरिक्त महसुल कर लगाए । रूसबाट कच्चा तेल किन्न जारी राखेको जरिवानाको रूपमा यो महसुल लगाइएको थियो । यो महसुल लगाइसकेपछि, छूट दिइएका केही वस्तुहरूमा बाहेक अमेरिका भित्रिने भारतीय सामानहरूमा कुल कर ५० प्रतिशत हुनेछ ।

प्रारम्भिक महसुल लागू हुनुभन्दा १४ घण्टा अघि ट्रम्पले अतिरिक्त महसुल अर्थात् ट्यारिफ लगाउने कार्यकारी आदेशमा हस्ताक्षर गरेका थिए । जुलाई ३० मा ट्रम्पले भारतीय सामानहरूमा २५ प्रतिशत कर लगाउने घोषणा गरेका थिए । यो महसुल बिहिबार अर्थात् अगस्ट ७ बाट लागू भएको छ ।

यसको २१ दिन पछि भने अतिरिक्त महसुल लागू हुनेछ । भारतले रूसबाट तेल किनेर युक्रेन भड्काउन मद्दत गरिरहेको ट्रम्पले बारम्बार भन्दै आएका छन् ।