काठमाडाैं । रुसले फेरि पश्चिमी युक्रेनमा मिसाइल र ड्रोनमार्फत् आक्रमण गरेको छ । युक्रेनी अधिकारीहरूका अनुसार यो पछिल्ला हप्तामा भएको सबैभन्दा ठूलो बमबारी हो ।

जापोरिझिया, निप्रोपेट्रोभ्स्क र ल्भिभ क्षेत्रमा आक्रमण भएको पुष्टि गरिएको छ । यस क्रममा एक जनाको मृत्यु भएको छ भने अर्को एक जना घाइते भएका छन् ।

यो आक्रमण त्यस्तो समयमा भएको हो जब युक्रेनी राष्ट्रपति भ्लोदिमिर जेलेन्स्कीले चाँडै नै रुसी राष्ट्रपति भ्लादिमिर पुटिनसँग शान्ति वार्ताबारे छलफल गर्न सक्ने विश्वास गरिएको छ। जेलेन्स्कीले वार्ता युरोपको कुनै तटस्थ मुलुकमा हुनुपर्ने बताउँदै स्विट्जरल्याण्ड, अस्ट्रिया वा टर्कीको इस्तानबुललाई सम्भावित स्थानका रूपमा उल्लेख गरेका छन् ।

युक्रेनी विदेशमन्त्री आन्द्रेई सिबिहाले आक्रमणपछि प्रतिक्रिया दिँदै भने, “यी आक्रमणहरूले यो युद्ध अन्त्य गर्न कूटनीतिक संवाद र बलियो हवाई प्रतिरक्षाको आवश्यकता झनै बढाएको छ ।”

पश्चिमी युक्रेनमा भएका यी ताजा आक्रमणपछि युद्ध अन्त्यको प्रयास र वार्ता सम्भावनाबारे पुनः अन्तर्राष्ट्रिय ध्यान आकृष्ट भएको छ ।