काठमाडौं । अमेरिकी राष्ट्रपति डोनाल्ड ट्रम्पले मंगलबार राति युक्रेनका राष्ट्रपति भोलोदिमिर जेलेन्स्कीसँग भेट गर्दै रूसी विमान नेटो देशहरूको एयरस्पेसमा छिरे तिनीहरूलाई खसालिदिनुपर्ने बताएका छन् ।

उनले रूसलाई ‘कागजी बाघ’ भएको पनि बताए । ट्रम्पले रूस पछिल्लो साढे तीन वर्षदेखि युद्धमा फसेको तर जित हासिल गर्न नसकेको बताए । उनले रूस वास्तविक सैन्य शक्ति भएको भए यो युद्ध एक हप्तामा समाप्त भइसक्नुपर्ने बताए ।

ट्रम्पले बैठकअघि संयुक्त राष्ट्रसंघको महासभामा दिएको आफ्नो भाषणमा युरोपेली देशहरूलाई रूसबाट तेल र ग्यास किन्न पूर्णरूपमा बन्द गर्न अपिल गरे । उनले नेटो देशहरूले आफैँ युद्धलाई आर्थिक सहयोग गरिरहेको बताए ।

युक्रेनका राष्ट्रपति जेलेन्स्कीले पनि सुरक्षा परिषद्को बैठकमा अमेरिकाबाट रूसमाथि थप दबाब दिन माग गरे । उनले जमीन फिर्ता लिने ट्रम्पको भनाइलाई गेम चेन्जर भएको बताए ।