नयाँ दिल्ली । बलिउड अभिनेता शाहरुख खान र उनकी श्रीमती गौरी खानको कम्पनी रेड चिलिज इन्टरटेनमेन्ट र ओटीटी प्लेटफर्म नेट्फ्लिक्सका नाममा दिल्ली हाई कोर्टले समन (उपस्थित हुन वा जवाफ दिन आदेश) जारी गरेको छ ।

नार्काेटिक्स कन्ट्रोल ब्यूरो (एनसीबी)का पूर्व अधिकारी समीर वानखेडेले दायर गरेको निवेदनको जवाफमा यो समन जारी गरिएको हो । अदालतले सबै पक्षहरूलाई आफ्नो जवाफ पेस गर्न सात दिनको समय दिएको छ । मुद्दाको अर्काे सुनुवाइ अक्टोबर ३० मा हुने तय भएको छ ।

सेप्टेम्बर १८ मा रिलिज भएको वेब सिरिज ‘द ब्याड्स अफ बलिउड’ले आफ्नो प्रतिष्ठामा कलंक लगाएको आरोप आफ्नो निवेदनमा समीर वानखेडेले लगाएका छन् ।

यो सिरिज शाहरुख खानको प्रोडक्सन हाउस, रेड चिलीज इन्टरटेनमेन्टले निर्माण गरिएको थियो । यसलाई नेटफ्लिक्समा प्रसारण गरिएको थियो । सिरिजमा एक पात्रले आफूलाई एनसीबी अधिकारीको रूपमा चित्रण गर्ने प्रयास गरेको र उनीमाथि छायांकन गरिएका दृश्यहरूले आफ्नो बदनामी गरेको आरोप वानखेडेले लगाएका छन् ।

सिरिजको कन्टेन्टलाई अपमानजनक घोषित गर्न अदालतलाई अनुरोध गर्दै उनले दुई करोड क्षतिपूर्ति मागेका छन् । सिरिज प्रसारण भएपछि सामाजिक सञ्जालमा धेरै अपमानजनक प्रतिक्रियाहरूको सामना गर्नुपरेको दाबी पनि वानखेडेले गरेका छन् ।

यसले आफ्नो सार्वजनिक छविलाई गम्भीर रूपमा क्षति पु‍र्‍याएको उनले भनेका छन् । सिरिज झुटो मात्रै नभएर यसले उनको व्यावसायिक इमानदारीता माथि पनि प्रश्न उठाएको पनि उनले बताए ।