वासिङ्टन डीसी । अमेरिकी राष्ट्रपति डोनाल्ड ट्रम्पले शनिबार ठुलो दाबी गरेका छन् । आफूले आठ युद्धमध्ये पाँच वटालाई अतिरिक्त भन्सार महसुल (ट्यारिफ) लगाउने धम्की दिएर रोकेको दाबी गरेका छन् ।

ट्यारिफका कारण अमेरिकाले विश्वभरका देशहरूबाट खर्बौँ डलर कमाइरहेको पनि उनले बताए । आफ्नो ट्यारिफ नीतिलाई सफल भएको र यसले अमेरिकी अर्थतन्त्रलाई फाइदा पुगेकोमा उनले जोड दिएका छन् ।

उनले करको धम्की दिएर आठ युद्धमध्ये पाँच युद्ध सीधै रोकेको आफ्नो सामाजिक सञ्जाल मञ्च ट्रुथ सोसलमा सेयर गरिएको एक पोस्टमार्फत भनेका हुन् । ‘हामीले ट्यारिफको कारण विभिन्न देशहरूबाट कर र लगानीको रूपमा खर्बौँ डलर लिइरहेका छौँ । मैले ट्यारिफको धम्की दिएर आठ युद्धमध्ये पाँच युद्ध रोकेको छु, किनभने उनीहरूले लड्न बन्द गरेनन् भने उनीहरूलाई ट्यारिफ लाग्ने खतरा छ,’ ट्रम्पले पोस्टमा लेखेका छन् । यस वर्ष मेमा भारत र पाकिस्तानबिचको सैन्य द्वन्द्व रोक्न पनि ट्यारिफको धम्की दिएकाले भएको दाबी ट्रम्पले गरेका थिए ।

तर, पाकिस्तानसँगको युद्धविराममा ट्रम्पको भूमिकाको पुष्टि भारतले गरेको छैन ।

अमेरिकामा अहिले महँगी नभएको पनि ट्रम्पले आफ्नो पोस्टमा लेखेका थिए । उनका पूर्ववति जो बाइडेनको कार्यकालमा अमेरिकामा महँगी इतिहासकै सबैभन्दा खराब रहेको उनको दाबी थियो । सेयर बजार ९ महिनामा ४८औँ पटक अहिलेसम्मकै उच्च बिन्दुमा पुगेको पनि उनले पोस्टमा लेखेका छन् ।

अतिरिक्त भन्सार महसुलले अमेरिकी अर्थतन्त्रलाई मद्दत गरेको र अमेरिकालाई लुट्नेहरूलाई निशाना बनाएर यो लागु गरिएकोमा पनि उनले जोड दिए । अहिले अमेरिका सबैभन्दा धनी, बलियो र सम्मानित स्थितिमा भएको र यसको श्रेय राष्ट्रपतिका रूपमा आफू चुनिनु र ट्यारिफ भएको पनि उनले पोस्टमा लेखेका छन् ।