काठमाडौं । बंगलादेशले आगामी आम चुनाव र जनमत सङ्ग्रहलाई दृष्टिगत गर्दै एक महिनाका लागि आगमन भिसा (अनअराइभल भिसा) निलम्बन गर्ने निर्णय गरेको छ । आगामी जनवरी १५ देखि फेब्रुअरी १५ सम्म लागु हुने गरी यो सुविधा पूर्ण रूपमा बन्द गरिएको हो ।

यस निर्णयसँगै बङ्गलादेशबाट यस्तो सुविधा पाउँदै आएका नेपाल र भुटान लगायतका छिमेकी देशका नागरिकहरू प्रत्यक्ष प्रभावित हुने भएका छन् ।

बङ्गलादेश सरकारका अनुसार फेब्रुअरी १२ मा हुन लागेको राष्ट्रिय संसदीय चुनाव र केही महत्वपूर्ण सुधारका विषयमा गरिने जनमत सङ्ग्रहका कारण सुरक्षा संवेदनशीलतालाई ध्यानमा राखी यो कदम चालिएको हो । जनवरी २२ देखि देशभर निर्वाचन अभियान सुरु हुने र सो क्रममा हुन सक्ने सम्भावित हिंसा रोक्न तथा सीमा क्षेत्रमा सुरक्षा व्यवस्था कडा पार्न भिसा सेवामा रोक लगाइएको त्यहाँका वरिष्ठ अधिकारीहरूले जानकारी दिएका छन् ।

चुनाव अवधिभरका लागि लिइएको यो निर्णयबारे बङ्गलादेशले सम्बन्धित देशका सरकारहरूलाई आधिकारिक रूपमा सूचित गरिसकेको छ । निर्वाचन सम्पन्न नभएसम्म यो सेवा पुनः सुरु हुने सम्भावना नरहेको स्पष्ट पारिएको छ । बङ्गलादेशमा विगतका निर्वाचनहरूको समयमा पनि सुरक्षा सतर्कताका लागि यस्तै प्रकारका निर्णयहरू लिने गरिएको थियो ।

निर्वाचनको तयारीका लागि बङ्गलादेशले देशभर सेना तैनाथ गर्नुका साथै अन्य सुरक्षा निकायहरूलाई समेत उच्च सतर्कतामा रहन निर्देशन दिएको छ ।