काठमाडौं । गत भदौमा भएको जेनजी आन्दोलनको समयमा जगन्नाथदेवल कारागार सुन्धाराबाट फरार भएका एक कैदीलाई प्रहरीले सात महिनापछि पक्राउ गरेको छ ।

लागु औषध मुद्दामा १० वर्ष कैद सजाय काटिरहेका काठमाडौँ महानगरपालिका वडा नं. २५ घर भई मनमैजु बस्ने ३५ वर्षीय मनिष राज श्रेष्ठलाई प्रहरीले ठमेलबाट नियन्त्रणमा लिएको हो ।

श्रेष्ठ २०८२ भदौ २४ गते आन्दोलनका क्रममा सिर्जना भएको अस्तव्यस्त परिस्थितिको फाइदा उठाउँदै कारागारबाट फरार भएका थिए । त्यसयता काठमाडौं उपत्यकाका विभिन्न स्थानमा लुकीछिपी बस्दै आएका उनलाई विशेष सूचनाको आधारमा खटिएको प्रहरी टोलीले चैत २ गते राति १० बजे ठमेल क्षेत्रबाट पक्राउ गर्न सफल भएको हो ।

पक्राउ परेका श्रेष्ठलाई आवश्यक कानुनी प्रक्रिया पूरा गरी पुनः कैद भुक्तानका लागि जगन्नाथदेवल कारागार पठाइएको प्रहरी वरिष्ठ उपरीक्षक एवं प्रवक्ता शिव कुमार श्रेष्ठले जानकारी दिएका छन् । श्रेष्ठ २०८२ असार २२ गतेदेखि उक्त कारागारमा कैद सजाय भुक्तान गरिरहेका थिए ।