काठमाडौं । इरानले एक अमेरिकी लडाकु विमान खसालेको दाबी गरेको छ । इरानको सरकारी सञ्चारमाध्यम इस्लामिक रिपब्लिक अफ इरान ब्रोडकास्टिङले सोमबार कुवेतमा अमेरिकी लडाकु विमान निशानामा परेको र त्यसपछि दुर्घटनाग्रस्त भएको दाबी गरेको हो ।

यद्यपि, अमेरिकी वा कुवेती अधिकारीहरूले यसबारेमा प्रतिक्रिया दिइनसकेको दि इकोनोमिक टाइम्सले जनाएको छ ।

यो घटनाको स्वतन्त्र रूपमा पुष्टि हुन नसकेको र दुर्घटनाको परिस्थितिका बारेमा थप विवरणहरू अस्पष्ट रहेको जीन१० ले जनाएको छ । रिपोर्टमा कुन प्रकारको विमान संलग्न थियो वा घटनाको प्रकृति कस्तो थियो भन्नेबारे खुलाइएको छैन ।

यस विषयमा अमेरिकी सेनाले अहिलेसम्म कुनै आधिकारिक प्रतिक्रिया दिएको छैन । प्रेस टिभीद्वारा प्रकाशित रिपोर्टमा अल–अहद न्युज नेटवर्कलाई उद्धृत गर्दै विमान खस्नुअघि त्यसमाथि प्रहार गरिएको हुन सक्ने दाबी गरिएको छ ।

यसअघि, अमेरिकी सेन्ट्रल कमान्डले इरानी सेनाले अमेरिकी लडाकु विमानहरू खसालेको भनेर गरेका दाबीहरूलाई खारेज गरेको थियो । कमान्डले ‘अपरेसन एपिक फ्युरी’ अन्तर्गत अमेरिकी सेनाले आठ हजारभन्दा बढी उडानहरू गरिसकेको र अहिलेसम्म कुनै पनि अमेरिकी लडाकु विमान इरानी सेनाद्वारा नखसालिएको भनी स्पष्ट पारेको थियो ।