काठमाडौँ । अख्तियार दुरुपयोग अनुसन्धान आयोगले इलामको चुलाचुली गाउँपालिकामा कार्यरत इन्जिनियर (छैटौँ तह) डिल्ली राज खड्कालाई ६ लाख रुपैयाँ घुस रकमसहित नियन्त्रणमा लिएको छ।

अख्तियारको टंगालस्थित कार्यालय र इटहरी कार्यालयबाट संयुक्त रूपमा खटिएको टोलीले खड्कालाई दमक नगरपालिका-१ स्थित एक खाजा घरबाट नियन्त्रणमा लिएको हो। टोलीले उनलाई सेवाग्राहीबाट लिएको भनिएको ६ लाख रुपैयाँसहित पक्राउ गरेको आयोगले जनाएको छ।

आयोगका अनुसार पुलको पुन:डिजाइन स्वीकृत गराउने तथा ठेक्काको भुक्तानी प्रक्रियामा सहजीकरण गरिदिने भन्दै खड्काले सेवाग्राहीसँग घुस रकम माग गरेको भन्ने उजुरीका आधारमा अनुसन्धान अघि बढाइएको थियो।

आयोगका अनुसार घटनाबारे थप अनुसन्धान भइरहेको छ।