काठमाडौं । नाइजेरियामा बाल महोत्सवमा भागदौड मच्चिँदा कम्तीमा ३० जनाको ज्यान गएको छ । भागदाैड मच्चिँदा अन्य एक सय जनाभन्दा धेरै घाइते भएका छन् ।

ओयो राज्यको राजधानी इबादानमा आयोजित बाल महोत्सवमा भागदौड मच्चिँदा ३० जनाको ज्यान गएको हो, ज्यान गुमाउनेमा धेरैजसो बालबालिका छन् । आयोजकले पाँच हजार जना बालबालिकालाई नगद वितरण गर्ने घोषणा गरेपछि भागदौड मच्चिएको चिनियाँ समाचार संस्था सिन्ह्वाले जनाएको छ ।

ओयो राज्यका सूचना आयुक्त डोटन ओयलेडेले आयोजकको उचित योजना र समन्वयको अभावले गर्दा दुःखद घटना भएको बताएका छन् । आफ्ना छोराछोरीको अवस्था थाहा पाउनका लागि नजिकैका अस्पतालमा सम्पर्क गर्न सरकारले आग्रह गरेको छ ।

प्रहरीले घटनाको अनुसन्धान शुरू गरेको छ ।