काठमाडौं । इजरायलले गाजामा प्यालेस्टिनी पत्रकारका ७ सयभन्दा धेरै आफन्तहरूको हत्या गरेको प्रतिवेदन सार्वजनिक भएको छ ।

सन् २०२३ को अक्टोबरमा गाजामा नरसंहार युद्ध शुरू भएदेखि इजरायलले कम्तीमा ७ सय ६ जना प्यालेस्टिनी पत्रकारका परिवारका सदस्यहरूको हत्या गरेको प्यालेस्टिनी पत्रकार सिन्डिकेटलाई उद्धृत गर्दै समाचार संस्था अलजजीराले जनाएको छ ।

सिन्डिकेटको स्वतन्त्रता समितिको प्रतिवेदनमा इजरायली सेनाले गाजामा आफ्नो नरसंहार युद्धको रिपोर्टिङलाई दबाउन सामूहिक दण्डको प्रयोग गरिरहेको उल्लेख छ ।

स्वतन्त्रता समितिका प्रमुख मुहम्मद अल–लहहमले सन् २०२३ देखि २०२५ सम्मको आक्रमणको ढाँचाले गाजामा स्वतन्त्र रिपोर्टिङलाई दबाउने इजरायलको मनसायलाई उजागर गर्ने बताउनुभएको छ ।

स्वतन्त्र समितिका अनुसार इजरायली सेनाले २०२३ मा ४ सय ३६ जना, २०२४ मा २ सय ३ जना र यस वर्ष कम्तीमा ६७ पत्रकारका आफन्तहरूको हत्या गरेको छ ।

धेरै परिवारहरू जबरजस्ती विस्थापित भएर पाल र अस्थायी शिविरहरूमा आश्रय लिन पुगे पनि ज्यान गुमाउने क्रम नरोकिएको समितिले जनाएको छ ।

परिवारका सदस्यको पत्रकारितासँगको व्यावसायिक सम्बन्धका कारण सयौं बालबालिका, महिला र वृद्धवृद्धा मारिनु मानवीय र कानूनी मान्यताहरूको घोर उल्लङ्घन गरेको समितिको भनाइ छ ।