वासिङ्टन डिसी । अमेरिकी राष्ट्रपति डोनाल्ड ट्रम्पले आफ्नो प्रशासनका प्रतिनिधिहरू इरान सरकारसँग वार्तामा रहेको बताएका छन् । यी वार्ताहरूले परिणाम दिने आशा आफूले गरेको उनको भनाइ छ ।

तर यसबीच उनले इरानलाई धम्की पनि दिएका छन् । ‘हामी हाल इरानसँग बातचित गरिरहेका छौं, तर मलाई आशा छ कि यसले सकारात्मक नतिजा दिनेछ, किनकि यदि त्यसतो भएन भने, केहि नराम्रो हुन सक्छ,’ ट्रम्पले एक वक्तव्यमा भने ।

इरानी विदेशमन्त्री अब्बास अराघची र ट्रम्पका विशेष दूत स्टिभ विटकोफबीच आगामी केही दिनमा टर्कीको इस्तानबुलमा प्रत्यक्ष भेटघाट हुने अनुमान बढ्दै गर्दा यो वक्तव्य आएको हो । रोयटर्सले छापेको समाचारअनुसार स्टिभ विटकोफ इजरायलमा छन् ।

उनले इजरायली प्रधानमन्त्री बेन्जामिन नेतान्याहूसँग भेट गरेका छन् । यो समाचारले बैठक इरान र अमेरिकाबिचको वार्तासँग सम्बन्धित हुन सक्ने सम्भावना बढाएको छ ।